Uncategorized

UMVUNDLA OTSHONTSHA IMALI . . . zatsha izakhamizi ngokutshontshelwa

12 Nov, 2015 - 17:11 0 Views
UMVUNDLA OTSHONTSHA IMALI . . . zatsha izakhamizi ngokutshontshelwa

uMthunywa

Ethel Ncube
IZAKHAMIZI zeGwitshi, eNkayi zisele zibambe owangaphansi kulandela ukubizwa kwabowafawa ukuthi bazokutsho ukuthi ngubani ozitshontshela imali kwafunyanwa ukuthi ngesinye isalukazi sakule indawo ebesithuma umvundla ukuthi uyetshontsha  imali emizini yazo.

Isiga lesi senzakale ngeviki ephelileyo lapho owafawafa abakhombe ugogo uEvelyn Tshuma ngomunwe bethi nguye ogcine umvundla obusuthwalise izakhamizi amagabha avuzayo ngokuzitshontshela imali.

Kubikwa ukuthi ugogo uMaTshuma wanika umvundla wakhe amabizo athi Madoladola lo Black Jesus njalo wayezwakala ebiza umvundla lo ngawo amabizo la nxa usuvela tshontsha imali zabantu.

Intatheli kaMthunywa ixoxe loMnumzana Thembani Ncube obike ukuba owafawafa babaphathisile sibili nanko phela sebezaphumula ukucatshelwa yimali ngendlela engazwisisekiyo.

“Abantu bebehlala bekhala esigabeni ikakhulu ngemali ezincane ezinjengamadola lempondo bacabangele ukuba ngabantwana besikolo abazithathayo besiyathenga ngazo ikanti hatshi kulomvundla ozipha imali zabantu ahambise kulowo omthumileyo.

“Ngesikhathi kukhitshwa umvundla lo emzini kagogo lo kwakungasimuntu kulitshebetshebe likaTshangani, kugcwele abantu njalo umsebenzi wathi uqalisa nje watholakala esanda kufika evela thatha imali komunye umuzi.  Umvundla lo wafika watshwathika imali  esikhwameni esasisendlini elala abazukulu,” kutsho uMnu Ncube.

Iphephandaba likazulu lizwe ukuba emzini kagogo lo okubikwa ukuthi ngumnikazi kamvundla bekungasweleki lutho.

Intatheli ixhumane lomunye umfakazi uNkosazana Sibongile Ndlovu ochaze ukuthi ayisiyomfihlo indaba kagogo uMaTshuma.

“Umnikazi walumvundla waqala evuma ukuthi ulento ethathela abantu imali zabo kodwa kwathi sokukhitshiwe waqala ukuyilandula indaba yakhe.”

Ekhuluma lentatheli uMnumzana Yenzani Ncube uveze ukuthi umvundla ubengamboni kumbe ukumuzwa nxa esethatha lawo madola.

“Abazibiza ngokuthi yizithunywa zeNkosi okuyibo abahlahlula ugogo ogcina into etshontshayo le babike ukuthi nxa sokuthatha imali awukuboni ubona ngemali ingasekho ucabange ukuthi uzayibona kodwa phinde uyithole.

“Into le yahamba yayakhutshwa kwatholakala kulenqumbi yemali endlini kaMaTshuma kwathiwa abantu kabayithathe besaba ngoba kuthiwa umvundla lowo wavula inkalakatha yelihlo izakhamizi zesaba yacina ithethwe ngabaphurofethi.”

UMthunywa ukhulumisane lalowo ocatshangelwa ukuba ngumnikazi womvundla ugogo uMaTshuma oveze ukuthi kalalwazi ngalokho okukhulunywayo.

“Mina angizange ngibone lutho ukuthi kwaphumani lokuthi kwahamba njani angikwazi. Ngesikhathi owafawafa bebuya lami bezokhipha abakukhiphayo ngasenginathiswe umuthi njalo bangibamba ngamandla bengihwabhela ukuthi bazelungisa emzini wami. Abantu abazange bangitshele okwaphumayo,” kulandisa ugogo uMaTshuma.

UMthunywa ubuye wakhulumisana losobhuku wakule indawo uMnumzana Mdelwa Ncube oveze ukuthi indaba yomvundla uyayazi.

“Indaba le ekhulunywayo liqiniso yinto eyenzakalayo. Kwakhitshwa umvundla okwakuthiwa nguye obetshontshela abantu imali wayatshiswa sikhangele.

“Owafawafa laba badingwa yithi ngoba ngaphandle kokucatshelwa yimali izakhamizi bezihlutshwa layimikhoba ehlala itshaya abantu lokunye nje okunengi okuhlupha abantu lapha, owafawafa laba ababizi muntu, akulamuntu obanjwa ngamandla uyazihambela bakutshele abakutshoyo wale nxa kungayisikho,” kuphetha usobhuku uNcube.

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds