uMthunywa
YiNtatheli kaMthunywa
KULENINA leChihota elipika ligqoke ezalo nanko phela umkalo owabhubhayo usephenduka ebusuku elande ukuzolimunya amabele.
UNkosikazi Grace Bangure oleminyaka yokuzalwa engu-61 osehlala eSouthlea Park, eHarare ubike ukuthi isipoko lesi okwakuyindoda yakhe uNoah Bangure wafa mhaka 16 Mabasa kuwonalo umnyaka ngesikhathi behambe emfeni kamalukazana wabo eMutoko. Uthe umkakhe wafela emoteni bevela beka lumalukazana.
“Kwaba yimihlolo ngoba umkami wafa engagulanga. Sasiphelekezela isidumbu sikamalukazana wethu eMutoko. Sagada sonke imota sesiphenduka eHarare lapho umkami aqala ukuthi uyatshiselwa kakhulu andubana afele khonapho emoteni.
“Isidumbu sakhe sasiwa emotsha yesibhedlela seMutoko,” kuchaza uNkkz Bangure.
Uthe umkakhe wahamba wayangcwatshelwa ekhaya lakhe koChihota.
“Sesimngcwabile umkami abangakibo kanye lami sadinga usizo kubosiyazi kwatholakala ukuthi wabulawa yimimoya evunguza emulini yangakibo. Kwakuphela abantu bengagulanga emulini yabo,” kuchaza uNkkz Bangure.
Uqhubeke esithi ngemva kwamalanga umkakhe ebhubhile waqala ukumphupha esiza kuye efuna ukwenza ucansi laye kodwa yena esala. Uthe lokhu kwakuphetha ngokuthi isipoko simunye amabele besesinyamalala.
“Konke okwakusenzakala ngangikwala ngisemaphutsheni khonapho.
“Ngokuya kwesikhathi amabele ami aqala ukuphuma uchago angathi ngilosane olumunyayo mina ngile cinathunjanga esileminyaka yokuzalwa engu-24,” kuchaza uNkkz Bengure.
Uthe okwakhathesi uyabe esizwa enyathezelwa ephupha umkakhe acine esembona esiza kuye engumuntu lapho afika amunye amabele akhe.
“Angilakuthula, isipoko somkami silokhe singimunya. Sengaze ngathutha kodwa siyangilandela.
“Asazi ukuthi umkami ungihluphelani, kungathi ngamzalela abantwana. Amabele akhona asehlala ephuma uchago,” kukhala uNkkz Bangure etshengisa abantu amabele akhe.
Uthi kwesinye isikhathi amabele akhe aba buhlungu ephuma amanzi.
“Emzini wami izindlu zonke ezinhlanu zilamaloja kodwa bonke sebabaleka ngenxa yezinto abathi bayazibona eziyabe ziguduza ezindlini zabo. Lami kulento engiziswelayo endlini yami kodwa ngiyabe ngikhiyile.
UNkkz Bangure uthe baswela injini yamanzi kanye lejenaretha endlini yakhe eyayikhiwe.
“Sengihlala ngedwa ngoba abantwabami balemisebenzi emihle, babaleka lapha njalo abafuni lokuphenduka. Izihlobo zomkami zonke azifuni kungibona.
“Indaba esegudwini ngeyokuthi umkami wabulawa yimimoya esemulini yabo kodwa abafuni kuvuma,” kutsho uNkzz Bangure.
Uphinde wathi kusukela ekuqaleni komnyaka ngakibo komkakhe sekwafa abantu abayisithupha bengagulanga.
Abafakazi baloludaba uPatrick Kupfunde kumbe ukhulu uBhaureni (52) oweMadondo eMt Darwin uthe umama lo umunywa ngondofa, hatshi isipoko somkakhe.
“Ondofa bayabuya bezenza indoda le eyafayo belahlisa. Izitha yizo ezithumela umama lo ondofa,” kuchaza uBhaureni.
Umphurofethi uPassmore Chinovava (33) owaziwa ngelokuthi Prangadhai uthe laba ngondofa abathwele umoya wendoda le eyafayo.
