uMthunywa
Nomthandazo Ndlovu
ABALIMI bakhuthazwa ukuthi bavikele izifuyo zabo zingabanjwa ngumqando njengoba kuyisikhathi sebusika nje.
Izifuyo ezinjengembuzi lezimvu zingabanjwa ngumqando zicina zibanjwa yimikhuhlane, kuthi nxa zingaselatshwanga ziphetha ngokufa.
UNkosazana Thandanani Moyo ongumlimisi uthe kuqakathekile ukuthi labo abafuye imbuzi babe lezibaya eziqinileyo ezingangenisi moya ngoba nxa imbuzi, ikakhulu amazinyane, angangenwa ngumqando acina ebanjwa ngumkhuhlane wesihlabo i-pneumonia.
“Abalimi kumele babone ukuthi izibaya zabo ikakhulu ezakhiwe ngezigodo ziqinile njalo azingenisi umoya kakhulu, lokhu kuvikela imbuzi ukuthi zingangenwa ngumqando,” kutsho uNkszn Moyo.
Uqhubekele phambili wathi abalimi bangafaka amahlanga loba amazenge njengenye indlela yokuthi babeleqiniso lokuthi imbuzi zabo kazingenwa ngumqando.
“Abalimi bangafulela izibaya zabo ngamazenge loba ngamahlanga ukuze imbuzi zingangenwa ngumqando,” kuchaza uNkszn Moyo.
“Ngalesi isikhathi sebusika kuqakathekile ukuthi nxa imbuzi sezilala ntambama umlimi athathe amazinyane awalalise endlini abesewasa esibayeni ekuseni, lokhu kuyindlela enhle yokuvikela lawa mazinyane ukuthi angangenwa ngumqando ngoba angangenwa ngumkhuhlane wesihlabo,” kulandisa uNkszn Moyo.
“Ngalesi isikhathi somqando kujayelekile ukuthi amazinyane amancane afe, lokhu kubangelwa yikuthi abesengenwe ngumqando kungakho kuhle ukuthi wonke umlimi athathe amanyathelo azakwenza izifuyo zakhe zivikeleke,” kuphetha uNkszn Moyo.
