uMthunywa
YiNtatheli kaMthunywa
OLUZULAYO luyadobha!
Lokhu kuchaza kuhle umdlalo kaRahman Kutsanzira ochinsa ukuthwala inkezo yeligi yeCastle Lager ngemva kwamasizini alitshumi.
Lumgadli weqembu leFC Platinum ubike ngeliphezulu ukuthi uyajabula ngokuba ngumdlali weqembu elibe yintshantshu yeligi yeCastle okumenze laye waba yintshantshu futhi.
Umdlali lo osebizwa ngelithi “Mbeppa” wazama inhlanhla kumaqembu amanengi abalisa iHighlanders leCaps United ukuthi adlalele ukuyiphakamisa inkezo kwehlula. Kusukela eqala ukugijima kunkundla zePSL ngesizini ka-2008, uKutsanzira ubenconywa ngabaqeqetshi ngokwenelisa ukugiqa unobhutshuzwayo kuzo zonke indawo zenkundla.
“Umoya wami uyavuma. Sengiyintshantshu kanobhutshwazo lami, sengize ngayithola inkezo ebengiyidinga iminyaka yonke le. Ngibonga uNkulunkulu ngoba okwamanje ngibalelwa kubadlali abadlale okohlonzi lwaphezulu.”
Utshele uMthunywa ukuba ubengeke aphumelele kulisizini kungela zixwayiso zomqeqetshi uNorman Mapeza.
“Umqeqetshi wethu uNorman Mapeza ngumqeqetshi kuzwa. Uyibambile inkamba yethu wasinikeza ithuba lokuthi sizitshengisele. Nginje ngenxa yakhe,” kutsho lumdlali owanikezwa ibizo elithi “Mbeppa” nguMapeza.
UKutsanzira kukhangelelwe ukuthi abizwe kubadlali abazangena kukhalenda yabadlali abenze kuhle kulisizini. Laye ulinde ngelibomvu ukuthi akhethwe.
“Kungahle kube yiKhisimusi eze masinyane nxa ngingakhethwa kukhalenda yeCastle Lager. Ukunqoba iligi sekungivuselele, lami sengizethemba ukuthi ngingaphuma kulikhalenda.”
Uthe njengeqembu sebehlose ukulolongela imidlalo yeCaf Champions League.
“Sesiqedelane leligi yakuleli singena kumidlalo yeChampions League. Akulula lapho esiyakhona kodwa sizadlala ngokuzikhandla.
“Abalandeli bethimu bengakhathazeki ngoba sesiqalisile ukugijima enkundleni yokulolonga. Kumele sidlale sifike kusigaba esingcono, hatshi ukuphelela kwesakuqala,” nguKutsanzira lo.
Umdlali lo oseke waphiwa isikhundla sikamsekeli kakaputeni uthe ukuchinsa ukuthwala inkezo yeCastle Lager kumele kube ngumzekeliso kubadlali abasakhulayo.
“Ngemva kweminyaka yonke le ngidinga inkezo ngiyiswela, bekuzwisa ubuhlungu. Ngaphosa ngajikijela ithawulo phansi. Ngithi kwabasakhulayo ibhola lenyawo lifuna umdlali ozimiseleyo. Kungaze kubenzima njani, akumelanga ulitshiye. Imivuzo ngeyalabo abasebenza nzima.”
UKutsanzira waphosa wayitshiya inguqu yakuleli esebizwa yiPlatinum Stars yaseSouth Africa ngesizini ka-2016. Asemanengi amaqembu kuleli laphetsheya ayefuna ukumthenga lumdlali.
Ngesikhathi ebikela leliphephandaba ngekusasa lakhe uKutsanzira uthe: “Ukuyadlalela phetsheya kwelizwe yisifiso somdlali wonke. Loba ngilesifiso sokuthi ngiyedlala phetsheya, ngisaselomlandu wokuthi ngiqhubeke ngidlalela iFC Platinum.”
“Iqembu leFC Platinum lingenze ngabangumdlali ohlonitshwayo. Ngibona angathi ngizaphumulela ngikulo.”
