uMthunywa
UPITSO Mosimane uvule isifuba ngo-Andile Jali okhonjwa kuMamelodi Sundowns eqeda kuwina i-Absa Premiership.
UJali usanda ukwehlukana le-KV Oostende yeBelgium abegijima kiyo njalo useke waphumela obala ngothando lokubuyela eSouth Africa.
Leliphephandaba selibike kanengi ngodaba lukaJali leSundowns. UMosimane uzwakale engacaci ngokusayinisa uJali.
“Siyamthanda ungumdlali osesigabeni esiphezulu. Ngakho nxa lisayinisa umdlali zinengi izinto okumele uzikhangele. Senze inqwaba yamaphutha kuSundowns eminyakeni edluleyo. Sasayina uPatterson (Matthew) loSibusiso Zuma ababebuya e-Europe kodwa angitsho ukuthi abazange badlale kuhle kuSundowns. Kumele ukhangele uhlobo lwabadlali oluletha eqenjini. Phakathi kwezinto okumele uzibuze zona yikuthi ngabe uyathanda ukusidlalela kumbe uzoqhuba isikhathi kumbe uzikhumbulela ekhaya,” kutsho uMosimane.
UJali watshiya i-Orlando Pirates ngo-2014 esiya phetsheya kolwandle eBelgium.
“Ngiyazifela ngo-Andile, kuBafana ngangimbiza. Usezingeni eliphezulu. Uyalwa enkundleni njalo nxa uthola umdlali onje ukhangela into ezinengi. Kumqoka ukuthi ngenze isiqiniseko sokuthi kuba lokuthula eqenjini.
Ngilabadlali abancane njalo inengi labo bathule njengalaba UPercy Tau, uTiyane Mabunda, uHlompho Kekana kanye loThapelo Morena. Siwenzile amaphutha phambilini. Bekulokuxokozela eqenjini okusidalele inkinga. Nxa sikhangela ngekhono ngicabanga ukuthi u-Andile angasidlalela,” kutsho uMosimane.
Indawo edlalwa nguJali ibangwa nguHlompo Kekana, Tiyani Mabunda, Asavela Mbekile, Oupa Manyisa loLucky Mohomi kuSundowns njengamanje. — ubelembu
