uMthunywa
YiNtatheli kaMthunywa
INDODA ehlala eJo’burg Lines (Majubheki), eMbare, edolobheni leHarare, iqunywe umlomo ngumkayo kulandela ukuqeda inyanga ezilitshumi ezigcweleyo iqanjelwa amanga ngumkayo ukuthi wabeletha usane olungumfana kukanti ngoluyinkazana.
Ithumba leli lize labhoboka ngoLwesibili kuyonale iviki ngemva kokuba umngane wenina leli encwebe indoda yomngane wakhe indlebe wamtshela ukuthi usane athi ngolungumfana eqinisweni ngoluyinkazana.
Ngenxa yokufuna ukugcina umtshado walo, inina leli kubikwa laliqambela umkalo amanga kusukela ngesikhathi libeletha lisithi “ngubaba” yena esazi mhlophe ukuthi “ngumama”.
UAyanda Tapera (26) uvumile kuntathelizindaba ukuthi waqambela umkakhe, uPassmore Muteve (28) amanga ngesikhathi ebeletha esibhedlela seHarare Central ukuthi ubelethe umntwana ongumfana okwenza uyise womntwana wajabula waze wametha ibizo lakhe ethi “usendo luyakhula”.
Intatheli ifice imuli le ixabana enkambeni yamapholisa kubangwa indaba le. Izakhamizi ezikhulume lentatheli ziveze ukukhathazeka ukuthi uTapera wayezayifihla kuze kube nini indaba le.
“Kuliqiniso sibili ukuthi ngaqambela umkami amanga ukuthi ngongumfana yena engoyinkazana. Lokhu ngakwenza ngoba umkami ngesikhathi ngizithwele wayehlala esithi ‘Ungazala umntwana oyinkazana kangifuni lakumbona lapha. Lihle liphume liphele lomntanakho ubuyele ngakini.’
“Ngokwesaba ukwaliwa, ngaqamba amanga ukuthi ngumfana umkami wametha ibizo elithi Passmore Delmon Junior ,” utshonjalo uTapera.
Inina leli lichaze ukuthi lalihlala ligqokise umntanalo impahla zabafana ukuze uyise womntwana, izihlobo kanye labomakhelwane bangaboni ukuthi yinkazana.
“Angazi ukuthi aluba lindaba ingaphumelanga egcekeni bengizathini kodwa isizatho esimqoka esenza ngenza isinqumo lesi yikuthi ngangifuna ukugcina umuzi wami.
Lokhu kuvele lamuhla ngoba kulomngane wami okhulule umntwana impahla wasebona ukuthi yinkazana andubana abikele uyise womntwana. Uyise womntwana, uMuteve uthe ubengakaze athole ithuba lomntanakhe okuyikho okwenza wangaboni ukuthi yinkazana kwaze kwaba ngoLwesibili lapho athi esezwe lokho wayamhlola wabona umhlola lo.
“UNkosikazi Mukanya umngane womkami nguye ongincwebe indlebe ngendaba le. Ngithe sengikubonile ngabiza odadewethu ukuze bazobona umhlolo.
“Kambe shuwa njengoba ngaze nganika umntwana oyinkazana ibizo lami. Ubaba wayefuna ukuyasihlabela inkomo eNechavava, eBuhera, mhlawumbe kayisuye wami ngoba kuthiwa umkami ulamanye amadoda athandana lawo,” utshonjalo.
Uqhubekele phambili esithi: “Abangakithi bajabula kakhulu kuthiwa sokulomntwana ongumfana sisithi usendo lwethu solukhulile. Khathesi besihlela ukuthi siyotshengisa ubaba umntwana.”
UPassmore uthe ngoLwesibili njalo yikho lapho athole ukuthi umntwana lo ulamakhadi ekilinika amabili, eliyi-pink eliphiwa abantwana abangamankazana leliyi-blue eliphiwa abantwana abangabafana. UTapera kachazanga ukuthi wawathola njani amakhadi amabili.
Uthe yena lezihlobo zakhe bafuna ukuthi yena lomntwana bayehlolwa igazi ukuze kubonakale ukuthi ngumntanakhe yini.
Isikhulumi samapholisa uAssistant Commissioner Paul Nyathi uthe indaba le kumele ichwayisiswe njengoba kulendaba zokutshontshwa kwabantwana ezenzakalayo kuleli.
“Asazi ukuthi kwenzakalani ukuze umntwana lo abe lamakhadi amabili elomfana lelenkazana. Kungakho kumele kuchwayisiswe.
“Aluba inina leli lathola ithuba lokutshontsha usane lalizakwenza ngoba lifuna ukugcina umuzi walo, yikho okwenziwayo nxa umuntu esenza icala,” kutsho uAsst Comm Nyathi.
UPassmore uthe sekuvele njalo ukuthi umntwana abehlezi emuthi ngumnawakhe womkakhe ngumntaka-nkosikazi wakhe.
UTapera uthe kafuni ukuthi umntanakhe aphiwe elinye ibizo lanxa waliphiwa kukholelwa ukuthi ngumfana yena eyinkazana.
