uMthunywa
Charity Moyo
ZISELE zinkemile izakhamizi sesiqinti seSovelele eMberengwa kulandela ukuzwa ngomntwana ovuke elele phezu kwengcwaba lakomakhelwane ebhunyumunyu.
UTendai Sibanda oleminyaka yokuzalwa engu-9 uvuke elele phezulu kwengcwaba elisemzini kaMnumzana Eliphanos Ngwenya ngoLwesibili kuviki ephelileyo.
Kubikwa umkaNgwenya wavuka ekuseni kakhulu njengenjayelo nanko phela mihla yonke uvuka elungiselela abantwana abafunda esikolo esikhatshana lalapha abahlala khona. Lwamtshaya lwameqa uvalo ephuma endlini ngoba wathi ethi mehlo suka wabona umntwana ongagqokanga elele phezulu kwethuna okwabangela ukuthi aphange abuyele endlini ukuyabikela umyeni wakhe.
UmkaNgwenya obizwa ngokuthi nguMaMoyo uveze ukuthi kalankani ngalokho akubonayo.
“Ngavuka ekuseni kakhulu njengensukwini ukuze ngilungisele abantwabami ngoba bafunda esikolo esikhatshana, ngathi nxa ngisiyalahla umlotha esilotheni lwangitshaya uvalo ngibona umuntu phezulu kwengcwaba.
“Ngagijima ngayavusa umkami yena owayelokhu elele, wethuka laye wathi sisondele eduzane sibone ukuthi kwenzakalani,” kutsho uMaMoyo.
Kuvele ukuthi ababili laba bathi nxa befika bamangala ukubona ukuthi kwakungumntwana kamakhelwane elele obukabhuka njalo engavunulanga.
UMthunywa uxhumane loMnu Ngwenya yena oveze ukuthi kwamangalisa ukuthola umntwana ekusimo esinjalo.
Uqhubekele phambili esithi okumangalisayo kakhulu yikuthi umntwana lo ubephezulu kwethuna “lesihlobo sethu esisibeke ensukwini ezisanda kwedlula”.
Uveze ukuba abantu besiqinti sabo bagangile kakhulu kodwa ngabe bayayekela ukusebenzisa abantwana abangazi lutho.
“Abantu besiqinti sethu bagangile kodwa ngabe bayekela ukusebenzisa abantwana abangazi lutho,” kuveza uMnu Ngwenya.
Kuzwakale ukuthi omakhelwane kanye labazali bomntwana babizwa ekufikeni kwabo bamangala bebona umntwana lo elokhu ezitshayela isathongwane.
Ebuzwa phambili kwabadala lumntwana uveze ukuthi ubuye labanye bakhe kodwa uthe kasoze atsho ukuthi ngobani ngoba bezambulala.
Ekhuluma lentatheli kaMthunywa uMnumzana Joseph Sibanda onguyise walumntwana uveze ukuthi lokhu okwenzakalayo kumqeda amandla njalo uyehluleka lokukuchasisa.
“Kuliqiniso konke okukhulunywa ngabantu ukuthi indodakazi yami yatholakala ilele phezu kwethuna lakomakhelwane kodwa angilawo amazwi okukuchasisa lokhu.
“Sizabuya sidingisise ukuthi kanti kwenzakalani ngomntanami,” kutsho uMnu Sibanda.
UMnu Ngwenya uthe sebavumelana labazali bomntwana, abakhokheli besigaba lezinye izakhamizi ukuthi bazahlala phansi babonisane ngodaba lolu ukuze lulungisiswe.
UMthunywa wenelise njalo ukukhulumisana losobhuku wesigaba lesi uMnumzana Davison Gumbo oveze ukuthi kuliqiniso lokhu.
Ubikele intatheli ukuthi bazahlala phansi njengesigaba badinge osiyazi ukuze baphungule ukuganga osokugcwele esigabeni sakhe.
Uthe kunyanga ephelileyo kuke kwavela elinye inina lesigabeni lesi likusimo esifanayo.
“Abantu besigaba lesi bayabambabamba imithi kakhulu. Ngizabuthanisa wonke umuntu esigabeni sicele enduneni yethu ukuze sidinge osiyazi bazosiphathisa,” kuphetha uMnu Gumbo.
