Uncategorized

UMNTWANA (6) UNYAMALALA ESIKHA IDELELE

24 Dec, 2015 - 00:12 0 Views
UMNTWANA (6) UNYAMALALA  ESIKHA IDELELE UFana Ngulube egqoke isigqoko esimnyama ngelanga lokuqeqetshwa kwakhe

uMthunywa

Cornelius Luphahla
ZIMADOLO nzima izakhamizi zeSihlengeni ngemva kokunyamalala komntwana oleminyaka eyisithupha mahlayana nje evela kukha idelele, uMthunywa ukuzwile lokhu.

Isiga lesi senzakale emavikini amabili adluleyo lapho uMnumzana Kenias Ngulube lomkakhe uNkosazana Annah Sibanda abalahlekelwe khona ngumntanabo uFana Ngulube,  evela kukha idelele ntambama.

Esinye isakhamuzi sakule indawo uMnumzana Albert Gumpo uveze ukuthi umntwana lo walahleka evela kukha idelele.

“Umntwana lo wasuka lomnewabo ekhaya besiyakukha idelele kodwa yena sekuphendukwa ngekhaya wakhokhela watshiya umnewabo emuva.

“Uthe efika ekhaya njengoba kwasekuntambama wananzelela ukuthi umntwana kakho okuyikho okwadala ukuthi abikele omakhelwane. Okusuka kumangalise yikuthi wayevele emekelelani ehamba yedwa,” kutsho uMnu Gumpo.

UMthunywa uvakatshele esiqintini lesi wakhulumisana loNkosazana Anna Sibanda ochaze ukuthi umntwana lo walahleka bengekho lomkakhe.

“Umntanami wacatsha ngingekho ngiyedinga imali kumkami koBulawayo kungakho  bangifonela ngehola lesificamunwe munye ebusuku besithi kabamboni.

“Kuthe kunjalo umqhatshi womkami wahle wasiletha ekhaya ngemota ukuzodinga umntwana,” kuchaza uNkszn Sibanda.

Uqhubekele phambili njalo waveza ukuthi badinga umntwana lo ubusuku bonke kodwa abazange bambona sokuze kulamuhla.

“Umntwana lo samdinga kwaze kwasa kodwa asizange simbone sokuze kulamuhla. Ngikhuluma nje angilamathe ngomntanami onyamaleleyo njalo angilamazwi engingawakhuluma ngaye ngoba ngizwa ubuhlungu kakhulu,” kuveza uNkszn Sibanda.

Uyise walo umntwana uMnumzana Kenias Ngulube uchaze ukuthi ukucatsha komntanakhe kuyamethusa njalo kuyamsolisa kakhulu.

“Ukunyamalala komntanami kuyangisolisa kakhulu ngoba ngeke alahleke evela kukha idelele eduzane yena ehlala esiya esikolo yedwa kukanti isikolo sikhatshana kulalapho ababeyekukha khona idelele.

“Ngokubona kwami kukhona okutshaya amanzi ekucatsheni komntanami. Okunye okungimangalisayo yikuthi umntwana lo sathi simdinga sabona omunye unkazana owathi ubone umntwana ehlezi esititshini eKessington wabalisa lempahla ezifana xathu lezazigqokwe ngumntanami ethi yizo abezigqokile.

“Isimanga yikuthi sathi sifika khonapho asizange sabona ngitsho lonyawo lomuntu,” kulandisa uMnu Ngulube.

Induna yakule indawo uMnumzana Zephania Sigola ubikele intatheli ukuthi sikhathele ngezimanga ezenzakala esigabeni sakhe.

“Kuliqiniso ukuthi kulomntwana owanyamalalayo njalo asikwazi ukuthi wadliwa yini kodwa lokhu kutshengisa ukuthi kulabantu abagangileyo esigabeni,” kuphetha induna uSigola.

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds