uMthunywa
KUSEHLAKALO esitshiye abantu beGwanika, eGokwe bemadolonzima kulomntwana oleminyaka engu-14 yokuzalwa okubikwa ubulewe luxamu kumaviki amabili edluleyo.
Ekhuluma lenthatheli yephephandaba likazulu uMnumzana Samson Moyo (48) onguyise womntwana obhubileyo ulandise ngesehlakalo esingajwayelekanga esaphetha ngokufa komntanakhe.
“Umntanami ubehlala ekhathazekile, ngingathi kudala waqala ukukhala ngento eyayimfikela ebusuku imkhame iphinde imhlukuluze ngokocansi,” kuchaza uMnu Moyo.
Uthe ngexa yalokhu basukumela phezulu bayadinga usizo kubosiyazi okuyikho lapho abezwa kuthiwa kuloxamu ovakatshela umntwana ebusuku.
“Sadinga usizo ezinyangeni ngaze ngakhipha inkomo yokubhadala inyanga ukuze ngisize umntanami osethwele nzima, engalali kuhle ebusuku,” kuchaza uMoyo
UMnu Moyo ubike njalo ukuthi isimo somntanakhe sasilokhe siqhubeka okwakusenza alale ekhala ubusuku bonke.
“Ngensuku zakhe zokucina wayelala ekhala ubusuku bonke esithi kulento emkhamayo isimanga yikuthi thina sasingayiboni linto ayekhuluma ngayo.
“Ngokuswelakala kwenhlanhla umntanami waze wedlula uhlupho lolu lulokhe lungakalungisiswa,” kuchaza uMnu Moyo
Ngemva kokubhubha komntwana abakoMoyo babethi mhlawumbe udubo lolu soluphelile kukanti babengabuzanga elangeni nanko phela lwaphinda lwaphenduka.
Abemuli yako Moyo babethi lindaba isiphelile bengazi ukuthi kukhulu okwakuzalandela ngoba uxamu lolu lwaphinda lwaphenduka.
“Sasicabanga ukuthi lindaba siyedlule lapho solubulele indodakazi yethu kodwa ngemva kweviki eyodwa sethuka lapho uxamu lolu soluphendukile njalo ukuzokhama indodana yethu eleminyaka elitshumi yokuzalwa.
“Sacina sibiza umphorofethi uChamunoda ‘Beyonder’ Macheredza ukuze azosisiza kuhlupho lolu. Balala bekhuleka ubusuku bonke benelisa ukuthi balubulale ngesikhathi bekhuleka,” kuchaza uMnu Moyo.
Umphorofethi uBeyonder ubike ukuthi uxamu lolu bekungumoya omubi okade ufuna ukubulala bonke abantwana baka Moyo.
