uMthunywa
UMCULO kamaskandi usulodumo kumhlubulo ongezansi kwelizwe ngenxa yokwanda kwabaculi abadabuka kulindawo abacindezela amadlalade beseMzansi. Kuminyaka engamatshumi amabili adluleyo, umculo lo ubusaziwa ungowabaculi abaphuma khona eSouth Africa kodwa ngokuya kwesikhathi usabalale kakhulu sekucula isizukulwana salabo abaqala lumsebenzi.
Ezabelweni zeMatabeleland, bakhona abaculi abakubona kufanele ukuthi balandele umzila ngokufikisa umaskandi ngapha komngcele kaLimpopo, osekulenengi labalandeli. Abaculi bakamaskandi labo sebeyinhlabathi kwelikaMthwakazi, okutshengisa ukuba ikusasa yalumculo ivulekile.
Iphephandaba likazulu lingene phansi lafukula umculi kamaskandi oselodumo kundawo ezinengi eMatabeleland obizwa ngokuthi nguMlandi weTshitshi. Umculi lo udabuka eNkayi kodwa okwamanje usebenzela eGoli lapho athola khona ithuba lokuthi abumbe idlalade lakhe elitsha eselidlalwa kumsakazo.
Nansi ingxoxo phakathi kukaNkosilathi Sibanda intatheli kaMthunywa loAnthony Tshuma.
Kungani umculo kamaskandi usulodumo kulezinsuku?
Abantu bakithi bayazi ukuba umculo lo ngowabo, ngowendulo ngakho sebevuleke amehlo, bakuvuma ukuthi umculo kamaskandi ngowekhaya. Isizatho sokumemetheka kwalumculo kungenxa yabalandeli bethu njengabaculi. Abalaleli sebenze kwabalula ukuthi labaculi abadabuka kuleli ilizwe bathole inhlonipho, ikakhulu ukuthola imicimbi. Umaskandi ngumculo okhuluma okuthinta impilo zabantu nsukuzonke. Sihlabela iqiniso njalo iziginci zethu zikhipha ichacho elitshiya lo olaleleyo eyifuna futhi.
Waziwa ngokuthi unguMlandi weTshitshi, kungani wakhetha lelibizo?
Libizo engasuka lalo kudala ngiqala kwezomculo. Lonke nxa liphelele nginguMlandi weTshitshi, Inyoni Emnyama. Ngalokho mina ngingumculi owenza umaskandi owehlukileyo kwabanye. Yilo ibizo elangifaka ebantwini bathi “Aah, nansi indoda ebesiyilindile.” UMlandi weTshitshi wazalwa ebizwa ngokuthi nguAnthony Tshuma esigabeni saseNkayi.
Sizwe ngodumo lwakho phose kuzo zonke izigaba zakoMthwakazi, ubona angathi umculo kaMaskandi ungabe usuthole ikhaya kuleli na?
Mina sengiqhunse ingoma zami eNkayi lapho engidabuka khona, eLupane, eTsholotsho, eNyathi, laseJotsholo bangazi qho. Sengibangenile laseMatabeleland South kuboFilabusi, koGodlwayo, Esigodini, eMbalabala, eKezi, ePlumtree lakwezinye indawo ezicatshileyo kwelakithi koMthwakazi. Kodwa akusibo balaleli bethu abakuleli abachazwa ngumculo wami, laseMzansi zikhona insizwa, odade labasakhulayo abasinxusa emithimbeni yabo ukuthi sizocula.
Bathini abantu ngomculo wakho?
Umculo kaMlandi weTshitshi , Inyoni Emnyama ubahlaba phakathi. Bayawukhwabitha umculo okokuthi nxa siqeda imicimbi yethu, bakhala ngokuphindwa njalonje. Nxa sithengisa ama-CD ayaphela. Sithola incingo abantu besazisa ukuba siphenduke ukuzobathokozisa.
Ngithanda ukwazisa abathandi bomculo ukuthi lumculo uligugu lethu. Ngumculo esawutshiyelwa ngabadala ngakho asiwulondolozeni.
Yibaphi abadala bomculo kamaskandi abakwenza wakhetha ukubalandela?
Lapho banengi. Bagcwala ibhavu sibili. Ngikhuluma ngabadala abafana loBhekumuzi Luthuli, uMgqumeni labanye engingeke ngabaqeda. Bakhona njalo abafowethu uZinja Ziyamluma okuyibo abasidonsela kulumculo.
Uwuqale nini lumsebenzi?
Ngingene kwezomculo ngomnyaka ka-2010 ngingaphansi kukaMqhelukelwa ngingumculi kwaze kwafika u-2013 ngasengicabanga ukuthi ngiphume ngenze okwami.
Kungani lonke abakamaskandi lithanda ukuyasebenzela eMzansi?
Ilizwe leSouth Africa lilakho konke. Kungcono ukuthi uyeqalela khona ngoba ukubumba lokudinda idlalade kutshiphile. Kwekakithi eZimbabwe angeke uphile ngokudula kwezinto.
Uyezwakala na umculo wakho emsakazweni?
Yebo. Ngibonga ukuvulwa kwemisakazo emitsha ebalisa iSkyz Metro leKhulumani FM lapha koBulawayo ngoba abasakazi sebetshikilisana ukutshaya ingoma eziphuma kudlalade lami elitsha Abakwethu.
LaseMzansi zikhona izititshi zomsakazo ezisekela ingoma zami okwamagama.
Sesizwe kanengi abaculi bekhala ngokuqilibezelwa emisebenzini yabo, kambe ukucula kuyaphilisa yini?
Thina abaculi sisemsebenzini. Ngemfanelo kumele lumsebenzi siphile ngawo. Asisebenzeli mahala.
Khonalokho okuncinyane esikutholayo kuyasiphilisa. Sicela ama-promoter ukuthi asihloniphe engadli imali yabaculi.
