uMthunywa
Ngaqambela umkami amanga
MZUKULU: Ngingumama oleminyaka yokuzalwa engu-30 njalo sengileminyaka emibili ngendile. Khulu ngaqambela umkami ukuthi ngiyintombi egcweleyo ngesikhathi engithatha, wavuma. Ngelanga lokuqala sihlangana ngazenza umuntu ongazilutho ngocansi lomkami kazange akunanzelele ngoba wayeqala ukuhlangana lowesifazane. Uhlupho khathesi Khulu yikuthi umkami usekwazi ukuthi ngamqambela amanga njalo wathi engibuza ngalandula kodwa wasengitshela izizatho ezimenza atsho njalo ngasengivuma.
Khulu khathesi-ke sekunzima endlini. Kasangithembi njalo kangifihleli lokho. Okwesibili kasafuni ngitsho ukuhlangana lami emacansini ngingaze ngixolise njani. Okwesithathu uselabanye asethandana labo njalo useze esithi umntwana kasuye wakhe. Ngenzenjani, kangifuni ukuthi umuzi wami uchitheke ngoba umkami ulothando.
IMpendulo
Mzukulu, esintwini bathi kuyazila ukuphanda amangcwaba ngoba okuphuma phakathi liphunga elibi. Bekungadingakali ukuba umkakho eme ngokuphanda amangcwaba. Izolo liyembelwa. Akukuhle ukubethela umuntu esiphambanweni ngamaphutha ayizolo.
Kuyadingeka mzukulu ukuba udinge izihlobo zakho eziseduze njalo ozethembayo uzilandisele ngohlupho lwakho njalo uzicele ukuba ziyekucelela uxolo kumkakho zimbonise ngothando olalo kuye yedwa, hatshi lingalungisa nguye ozabe esekuhlupha ngengubo ngoba umoya wakhe uzabe usuhlezi.
Wena mana ngokucela uxolo njalo ubonise ukuba umuzi wakho uyawuthanda. Laba abaseceleni kuzaphela lokhu, uhlupho lwenu lungedlula. Akukuhlanga ukuba laye abalekele umuzi wakhe ngokudinga eceleni. Vikelani imikhuhlane bazukulu.
Umkami ukhipha imali ngudlu
Khulu: Ngithemba uphilile. Ngicela uncedo kuwe, ngiphatheke kabi enhliziyweni. Umkami ngamfica elomntwana oyedwa njalo lowomntwana wayehlala lonina kodwa wayengamenzeli lutho.
Ngasengikhuluma laye ukuthi akukuhle ukuthi alahle umntanakhe kungakho saqala ukumsapota. Umntwana besimenzela konke sisonke lomkami. Unina womntwana sewendela kwenye indoda. Uhlupho Khulu yikuthi umkami khathesi usenika unina womntwana imali mina ngingakwazi sengibona nje ngamaphepha ebhanga.
Lokhu Khulu kungizwisa ubuhlungu ngoba ngabathola bengakhulumisani kodwa khathesi usefuna ukungenza umuntu omubi. Kungakho ngicine ngisithi kuye mina kangisamenzeli lutho futhi umntanakhe. Mina lomkami silomntwana oyedwa. Ngiqondisa Khulu nxa ngiphambanisile ngokwenza isinqumo lesi.
Impendulo
Ingane yingilosi kamlimu mzukulu, kayilacala, wena ungami ubuhle obenzela ingane ngokungathembeki kwalaba ababili. Kubonisa ukungathembeki komkakho mzukulu ngokuba lina selilungise izinto zaba zinhle yena akubhode ngemuva. Yehlisa umoya wakho mzukulu ingane kayilacala.
Hlala uyincedisa njalo uyiphathe njengeyakho njengoba udaba lolu lungolwakho lomkakho. Kuyadingeka mzukulu ukuba ucele umalume wakhe kamkakho kumbe isihlobo uvule ubuhlungu bakho. Ngilethemba labo bazaba lendlela yokuhluba indlubu ekhasini.
Uthi kasafuni mtshado
KHULU: Ngithemba uqine saka mntomdala. Ngingumama oleminyaka engu-29 umkami wayethethe njalo watshada kodwa behlukana lomkakhe.
Thina sesilabantwana ababili njalo umkami ngesikhathi ezovela wathi ufuna sitshade kodwa khathesi sekudlule iminyaka emihlanu, nxa ngikhuluma ngomtshado uthi yena watshada kudala kasafuni futhi ngoba kwenza ukuthi omama bacine bengasaziphathanga emtshadweni. Khulu ngenzeni?
Mina kusukela ngisemncane ngangifisa ukutshada kodwa kukhanya lokhu sekuzakuba liphupho nje. Ngeluleka Khulu?
Impendulo
Ngiqinile mzukulu. Into yonke iyalungiswa ngomlomo, lawe ungaba lakho ukuba ufeze iphupho lakho lokutshada. Okokuqala akukho emthethweni ukuba umkakho athi ukuthethe yena elokhu elesithupha somtshado esiphilayo lomunye umama.
Kumele ayecitshisa umtshado omdala abe esekutshada wena. Nxa silandela umthetho wena kawulasabelo empahleni zalapha ekhaya ngoba ukhona omunye eceleni ophethe incwadi emnika ilungelo. Zama ukuhlala phansi lomkakho umbonise ngephupho lakho lokutshada langokuqakatheka kwakhe empilweni yakho.
Kayithembeki intombi yami
KHULU: Ngikufisela impilo enhle njalo ende futhi. Ngilijaha ngifuna ukuthatha, kodwa umuntu engifuna ukumthatha usengenze ngaba yingwe lenja labakibo ngoba sekukabili kuthiwa kabonakali kodwa engekho kimi esuke esithi uza kimi.
Khulu lokhu sekusenza kubenzima ukuthi ngikhulumisane labakibo ngoba bengithuka ngokuthi angilanhlonipho. Mina bengimthanda lunkazana pho-ke. Ngicela ungibonise Khulu. Kumbe ngihle ngehlukane laye?
Impendulo
Ngiphilile mzukulu wami. Nxa engekho kuwe pho uyabe engaphi lapho okungazi abazali bakhe? Kubonisa ukuba kukhona okutshaya amanzi lapha, njalo kutsho ukuthi ubhukutsha lengwenya mzukulu, eyabe izakubamba kusasa.
Bekungaba kuhle ukuba lithathane lentombi yakho liyebona izihlobo zayo eziseduze ubalandisele ukuba nxa engekho ngakibo uyabe engekho lakuwe futhi, laye azitsholo ukuba uyabe engaphi ukuze indlubu ihlutshwe ekhasini.
Kuyadingeka ukuba lingakakhulumi ngokuthathana liqale lilungise udaba lolu lokuba ngumhlambi kazelusile. Mbuzeni ngokuhamba kwakhe njalo nxa impendulo zikwanelisa hatshi qhubekela phambili kodwa nxa ungasuthiseki kuhle livalelisane.
Umkadadewethu ulobukhwele
KHULU: Ngileminyaka engu-24 ngihlala lodadewethu lomkakhe kusukela ngileminyaka engu-13. Khulu sengileminyaka emithathu ngithandana lomkadadewethu kodwa khathesi sengilejaha lami njalo lifuna ukungithatha.
Uhlupho esengibhekane lalo yikuthi umkadadewethu uyala ukuthi sehlukane uthi uzatshela ijaha lami ngobudlelwano bethu. Ngenzenzi Khulu, ngiyesaba ukutshela udadewethu ngoba nguye obengenzela konke. Abazali bethu babhubha.
Impendulo
Indaba yakho ibuhlungu kakhulu mzukulu ngoba okwamanje usuphakathi kwelitshe lembokodo. Udadewenu ubekuthemba njalo ekwenzela konke kodwa wena wamudla izithende.
Hatshi-ke mzukulu izolo liyembelwa ngaso sonke isikhathi umuntu uyakhula esuka ebubini esiya ebuhleni. Lawe tshiyana labo bonke ububi obenzela udadewenu, kakube yingcekeza yayizolo nje, mtshele laye lubaba ukuba engenza konke akukwanisayo kodwa wena lamuhla usukubonile ukukhanya usufuna ukulungisa lokwakha owakho umuzi.
Laye uyabe ekwethusela isikhathi esinengi edinga indlela zokukubamba kuhle. Khula mzukulu uhloniphe udadewenu okuthanda kangaka lawe uqhubekele phambili udinga ukwakha owakho umuzi.
