UMitchell ‘utshiya’ iKaizer Chiefs

15 Jun, 2017 - 02:06 0 Views
UMitchell ‘utshiya’ iKaizer Chiefs Mitchell Katsvairo

uMthunywa

YiNtatheli kaMthunywa
UMDLALI weZimbabwe uMitchell Katsvairo usekhalala umdlalo ngenxa yokuthi wafika kuKaizer Chiefs wahlala ebhentshini okwesikhathi eside.

Iphephandaba likazulu likuveza mhlophe ukuthi umdlali lo, obetshibilikela iChicken Inn ekuleli kumasizini amabili adluleyo, wethusele izikhulu zeKaizer Chiefs ukuba uzayifulathela ithimu yeNaturena.

Isizatho sakhe sinye — ngoba wancitshwa isikhathi sokudlala.

Imbiko efinyelele amahofisini kaMthunywa iveza ukuthi uKatsvairo ubeke isikhalazo sakhe ngemva komkhosi wokubonga abadlali baleliqembu kumaviki amabili adluleyo.

UKatsvairo oleminyaka yokuzalwa engu-27 ufike kuMakhosi elomunye wakhe owayekuChicken Inn uEdmore Chirambadare.

Ekufikeni kwakhe, bekukhangelelwe ukuthi adonse amasizini amathathu.

Kubikwa, ngokuthenga lumdlali, iqembu leKaizer Chiefs belifuna ukuthi adlale njengo-Knowledge Musona owafika wabayintandokazi yabalandeli kodwa kwehlula ukuthi akwenze lokhu uKatsvairo.

Kulombiko njalo ophuma kunkokheli zeChicken Inn othi mhlawumbe uKatsvairo engaphenduka ekhaya. Umfakazi oqotho osebenzela iChicken Inn wazise uMthunywa ukuthi iqembu leli lithe lisizwa ukuthi uKatsvairo engaphuma kuChiefs, lakubona kungcono ukuthi libengelinye elizamnxusa enkundleni zalo.

Ekhuluma lentatheli le ngoMvulo waliviki, uKatsvairo umane wala ukuchaza okunengi wabika ukuba umaneja wakhe nguye obambe udaba.

“Kungcono ukhulume lomaneja wami . . . ,” kutsho umdlali lo ngoMvulo.

Imizamo yokuxhumana lophethe umsebenzi kaKatsvairo uMichael Ngube oweM-Sports Management ubeke umbiko ebulenjini eseSouth Africa ebika ukuthi kuliqiniso ukuba umdlali lo usekhalala umdlalo kuMakhosi.

“Mancane kakhulu amathuba okuthi uKatsvairo uzobe edlala kuChiefs ngesizini ezayo. Angu-80% amathuba okuthi uzobolekiswa. Njengabo bonke abadlali bafuna ukudlala njalo, yingakho sihlela ukuthi abolekiswe kwamanye amathimu ukuze athole ithuba lokudlala.

“Umdlali lo ulokhe engoweChiefs ngoba ulokhe elesivumelwano leqembu. Kukhona iqembu esikhuluma lalo ukuthi alidlalele. Okwamanje besingakaxhumani leChiefs ukwazisa ngaleliqembu,” kubika uNgobeni.

Ekuqaleni kwesizini uKatsvairo ulitholile ithuba lokudlala kodwa wehluleka ukuhlohla ngendlela obekukhangelelwe ngayo. Utshaye amabhola amabili emidlalweni engu-12 yeligi.

Lokhu kuphoqe umqeqetshi weChiefs uSteve Komphela ukuthi asebenzise uBernard Parker lo-Edward Manqele phambili.

Amakhosi aqede isizini engelalutho ekhabothini.

“Nxa umdlali ezobolekiswa zinengi izinto ezikhangelwayo. Phakathi kwazo yindaba yokuthi uzobhadalwa njani.

“Kungakho ngithi amathuba okuthi abolekiswe angu-80% okwamanje. IChiefs siyayazi-ke ayilona iqembu okunzima ukuxoxisana lalo,” kutsho uNgobeni.

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds