Uncategorized

Umila iqhubu elilingana lekhanda esihlathini kubangwa indoda

16 Feb, 2017 - 00:02 0 Views
Umila iqhubu elilingana lekhanda esihlathini kubangwa indoda ULydia Manyangonya

uMthunywa

Cornelius Luphahla
ZIKHUZA imihlola izakhamizi zesigabeni seDumbura eGokwe ngemva kokuzwa ngelinye inina elifungelwe ijoyi ngunyanewabo ngemva kokuxabana lamila inkalakatha yeqhubu elilingana lekhanda esihlathini lafa ngemva kosuku olulodwa.

Okunye njalo okumangalise izakhamizi yikuthi indoda yalaba ababili ihle yadliwa ngumswenya umkayo esanda kufa.
Indaba le esansumansumane yenzakale emavikini amabili adluleyo lapho uNkosazana Nokuthula Manyangonya (18) obethethwe nguMnumzana Elphas Masuku (45) amile khona iqhubu esihlathini wafa ngemva kokuxabana lonyanewabo uNkosazana Enja Ninji (40) okucatshangelwa ukuthi nguye owamphosayo.

Kubikwa ukuthi ngesikhathi uManyangonya esifa umkakhe wayekoBulawayo emsebenzini wathi etshelwa ngemfa le wezwakala eqhinqa isililo, ngemva kwalokho ucingo lwakhe lwangasangeni njalo kazange alugxobe esililweni somkakhe.

UMthunywa uvakatshele kule indawo wakhulumisana loMnumzana Brighton Choto ongumalume kaNkszn Manyangonya wathi okwenza bathi umzukulu wakhe wabulawa nguMaNinji yikuthi baxabana wasemfungela esithi kasoze awadle amabele awalimayo.

“Mina okwenza ngithi umzukulu wami wabulawa nguMaNinji yikuthi wathi ngesikhathi umzukulu esanda ukwenda baxabana lonyanewabo ethi kungani emthathela umkakhe. Kuthe kunjalo balwa wehlulwa uMaNinji wasemtshela ukuthi akasoze ayilime insimu oyicentayo okuchaza ukuthi uzakufa.

“Kwathi kunjalo umzukulu wabuya wazosibikela kodwa akuphelanga nsuku ngaki sezwa sokuthiwa uyagula umile iqhubu esihlathini. Sithe sisiyafika emzini wakhe sathola kuthiwa usesesibhedlela kodwa kuthe kusiyakusa esebhubile. Okwangimangalisayo yikuthi iqhubu lelo laselikhule okwesabekayo seliphosa lilingane lekhanda lakhe ngosuku olulodwa nje zwi,” kutsho uMnu Choto.

Ekhuluma lentatheli uNkosazana Lydia Manyangonya ongudadewabo kamuyi uthe uzwa ubuhlungu kakhulu ngokubhubha komnawakhe njalo olesandla kikho  uzazibonela.

“Mina ngizwa ubuhlungu kakhulu ngokubhubha komnawami ngoba ufe ngendlela engazwisisekiyo okuchaza ukuthi kukhona umuntu olesandla kikho. Noma kunjalo owambulalayo laye uzazibonela ngoba ngeke sahlala phezulu kwezandla thina sibona ukuthi kukhona okutshaya amanzi ekufeni kwakhe,” kutsho uNkszn Manyangonya.

Ebuzwa ngale indaba uNkszn Ninji uthe yena kaloyi kodwa wasebenzisa amatshe omthandazo ukuthi umuntu omchithela umuzi wakhe azibonele.

“Mina kangithakathi ngingumPositoli ngakho ngasebenzisa amatshe omthandazo ukuthi umuntu ongichithela umuzi wami azibonele. Kungakho ukuthi yimi engabulala unyanewethu kangikuvumi kodwa wabulawa nguNkulunkulu,” kutsho uNkszn Ninji.

Induna yakule indawo uChiya Chireya ibuzwa ngale indaba ivumile ukuthi iyayazi yathi layo yethuka ikuzwa lokhu ngoba lendoda yahle yanyamalala.

“Kuliqiniso sibili ukuthi kulendoda eyafelwa ngumkayo omncane ngemva kokumila iqhubu exabane lonyanewabo kwathi sokubuzwa unyanewabo wathi usebenzise imithandazo ukuthi aqinise umuzi wakhe.

“Okwangethusa kakhulu yikuthi lendoda yakhona yahle yanyamalala lakhathesi kayibonakali, asazi kumbe iyaphila,” kuphetha induna uChireya.

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds