uMthunywa
YiNtatheli kaMthunywa
OWESIFAZANA oleminyaka yokuzalwa engu-37 ohlala eHarare uphakathi kwetshe lembokodo nanko phela ngaso sonke isikhathi nxa efuna ukuya emacansini umila isitho sowesilisa kumbe isitho sakhe sivaleke ngci kube lidwala.
Lokhu sokubangele ukuthi ahlale iminyaka emine engazi ucansi lanxa esethethwe ngamadoda ayisificaminwe mibili besehlukana kubangelwa yilokhu.
Inina leli elicele lagomela ukuthi ibizo lalo lingakhitshwa kuphephandaba sizaletha igama elithi Ruth Chacko.
Lithe uhlupho lolu lwaqala ngemva kokwehlukana lendoda eyayimthethe kuminyaka emine eyedluleyo okwenza acabangele ukuthi nguye owamfaka ulunyoka lolu ngoba wayengafuni ukwaliwa.
“Sengidubekile bantu beNkosi, ngifuna uncedo, ngangendile njalo ngilotsholiwe. Indoda le yayingihlukuluza kakhulu njalo ihlala ingitshaya okwenza ukuthi ngimale lanxa engazange akwamukele lokhu.
“Ngokunjalo wathi uzaqedelana lami, kusukela lapho kangizange ngenelise ukuhlangana lomunye umuntu wesilisa. Sengileminyaka emine nginjalo,” utsho njalo.
Owesifazana lo olabantwana lendoda yakhe yakuqala, uthe ngemva kokwehlukana laye waba lamanye amadoda ayisificaminwe mibili kodwa behlukana bebaleka ngoba ngesikhathi nxa efuna ukuya labo emacansini isitho sakhe sangasese siyaphenduka sibe ngesowesilisa njalo esikhulu okumangalisayo.
“Sengehlukene lendoda le, kangikaze ngiye emacansini lalo engiyabe ngithandana laye ngoba isitho sami sangasese siyaphenduka sibe ngesowesilisa esikhulu kakhulu. Nxa kungaba njalo indoda engiyabe ngilayo iyabaleka abanye njalo babaleka bengagqokanga ngokwesaba sihle sehlukane.
“Sengehlukane lamadoda angu-8 wonke ayethembisa ukungilobola ngoba lami umuzi ongowami ngiyawufuna,” kutsho uChacko.
Uthi ngaleso sikhathi ihloka leli liyabe selilungele ukugamula okokuthi laye uyesaba lokulibamba.
“Nxa indoda engiyabe ngilayo ibaleka, ngiba lesikhatshana sokuthi ngingaqedisisi ukuthi ngingubani ngoba sengilesiyezi ihloka leli lize linyamalale ngisale lesitho sami sowesifazana.
“Ngiyaphela amandla njalo ngizwe ngitshiselwa ihloka leli nxa linyamalala, kuthi esami isitho sisala sesiluma, sitshisa njalo sibuhlungu,” kutsho uChacko.
Uthe kwezinye izikhathi nxa efuna ukuya emacansini isitho sakhe sangasese sitshintsha sibe lidwala owesilisa ehluleke ukuhlangana laye.
“Izinto lezi ziyehlukana, kwesinye isikhathi kuba lidwala okwenza indoda yehluleke ukuhlangana lami. Kwezinye izikhathi kumila isitho sowesilisa, kangisaphili kuhle ngitsho.
“Lami ngilemizwa bakithi, khumbulani kambe shuwa iminyaka emine ngingazange ngihlangane lowesilisa, kambe yikuthwaliswa nzima okunganani lokhu?
Ngake ngabuyela izikhathi ezimbalwa kumkami owangilobolayo ngisithi angilungise kodwa wathi akukho akwaziyo waze wafa. Lapho engihamba khona bathi wangifaka ulunyoka lokuthi ngingabi lenye indoda,” utsho njalo.
Inina leli lilabantwana ababili njalo lithi lifuna abanye abane kodwa kuyehlula ngenxa yesimo elikuso.
“Kunjenje kulendoda engithandana layo, efuna ukungilobola kodwa asikaze sihlangane, ucela ukuthi sihlangane kodwa ngiyesaba ukuthi angabona lokhu angahle angibalekele njengabanye kungakho ngidinga uncedo,” utsho njalo.
“Ngacela abazali bami ukuthi babisele amalobolo endoda eyayingithethe bavuma. Kodwa uhlupho oselukhona yikuthi indoda le seyafa njalo abakibo bathi kabenelisi ukunginceda kuhlupho engiphakathi kwalo.
Abafisa ukuncedisa inina leli bangalithinta ku0778448083.
Ugogo uAlice Masoko (66) owaziwa kakhulu ngokuthi Gogo Kwenda laye ohlala eHarare uthe inina leli lidinga ukuncediswa masinyane.
“Inina leli lenzelwa ulunya yindoda eyayilithethe eyamfaka ulunyoka lokuthi angenelisi ukuhlangana lenye indoda empilweni yakhe. Kodwa lokhu kuyalungiseka, lolu yilunyoka lukafudu ngoba ufudu uyacatshisa ikhanda aveze inyawo nxa esefuna. Abanye njalo bathi yilunyoka lwedwala.”
