uMthunywa
KUTSHAQEKE abazalwane kwaphazamiseka inkonzo okwesikhathi esingangehola elilodwa ngesikhathi umfundisi eveza ukuthi usebenzisa inkosazane yasemanzini, injusi okulenkolelo yokuthi simise okwentokazi ngasenhla lenhlanzi ngezansi.
Odalule lezi zindaba ezitshiye abazalwane betheneke amadolo, nguMfundisi Bongani Gumede (31) webandla elibizwa ngokuthi Ubizo International Church.
Ubekhuluma ngempelasonto kwindumezulu yenkonzo kaNtulikazi yaleli bandla ebisenzelwa etendeni ebeligxunyekwe eMakhutha indawo eseSouth Africa.
UGumede uthe le yimfihlo emayelana lenhlanhla yakhe. Uthe linhlanhla uyilanda emfuleni oseRiverside, eMzimkhulu lapho okuhlala khona linjuzu, yize yena edabuka endaweni yaseKorinte. Uthe izinkumbi zabantu abatheleka masonto onke kuleli bandla, umcebo wakhe, yimfuyo egcwele isibaya, yizimota zikanokutsho lemizi yakhe, konke lokhu kungamandla ale nkosazana yasemanzini.
UGumede waziwa layingane encane eMzimkhulu ngenxa yamandla akhe ekwelapheni. Uthe waqala ukuxhumana lalesi silwane esafunda ezikolo zamabanga aphansi.
“Ngangileminyaka engu-11. Ngangivame ukuphuma esikolo ngiqonde kulesi siziba ngiyoxhumana lenkosazana. Abantu babexakeka ukuthi yini engivame ukukhuluma layo kulumfula kanti yilenkosazana. Ekhaya baze bayohlola komunye umthandazi wakoDlamini, wafika wabatshela ukuthi mina ngizokwelapha abantu ngenxa yamandla engilawo,” utsho kanje.
Uthe lasesikolo watshiya ekuGrade 11.
“Lakho ngangifinyelele nzima kuwo ngenxa yalo lolu bizo.”
Ngokwakhe, banengi abantu asebasizile ngenxa yamandla awathola kulesi silwane.
“Kulenqwaba yabafundisi abaziwayo abeza kimi ukuba ngibase kunkosazana ukuze ibandisele abazalwane. Lezikhulu zamaqembu ebhola zifika zidedelana. Abanye bayaba lenhlanhla yokuzikhulumela lenkosazana noma kube yimi obakhulumelayo,” kuchaza yena.
Yiloba iphephandaba le-Isolezwe ngoMgqibelo belizifikele mathupha kule nkonzo kodwa lithe uma lithinta lumfundisi ngemva kwenkonzo, wakuqinisekisa ukuthi abekutsho bekuliqiniso.
“Yona inkonzo ike yama ihola lonke kodwa ngiyazi abethukileyo yilabo ebebeqala ukuza enkonzweni yami.”
LangoLwesine uthe abantu bebesaqhubeka ngokuhambela emfuleni. “Ngikhuluma nje kulabantu abangaphezu kuka-200 abavela ngitsho lasemazweni angaphandle.”
UGumede ugonyuluka ngaloludaba nje, kuhlaluka ukuthi kukanengi abantu bakule ndawo bemsola ngokuthi uthwele, okuyinto ayiphikayo.
“Mina angithwele, phela umuntu othwele kuyafiwa kwakhe. Mina akukaze kufiwe lapha ekhaya, izingane zami zonke zisaphila. Le nkosazana nje yenza izinto zenzeke ngaphandle kokubulala abantu,” utsho kanje.
Kubazalwane abakhulume laleli phephandaba, abanye bathe yize betshaqekile kodwa basazobambelela kuGumede ngenxa yokuthi kulemindeni ayondlayo lezingane azifundisa ezikhungweni zemfundo yaphezulu — Ubulembu.
