uMthunywa
ABAZALWANE beDivine Glory Ministries bakhonona ngomfundisi wabo obanathise umuthi owamagundwane obulalayo enkonzweni okwenze bathi usedlulele phambili kungakho kungenzeka ukuthi ufuna ukubabulala.
Umfundisi lo ensukwini ezimbalwa ezedluleyo kubikwa udlise abazalwane amaphilisi okubulala amagundwane iRattex andubana athi bawanathise ngomuthi wokugezisa izambuzi i-domestos.
Kunkonzo eyisimanga eKagiso Mogale ngeSonto, umfundisi uSipho Mphakathi utshele abazalwane ukuthi lokhu akwenzayo yizimanga.
Ubike ukuthi kumele banathe umuthi wamagundwane kanye lomuthi wokugezisa izambuzi ngoba efuna ukubatshengisa izimanga zamandla kaNkulunkulu ngoba akekho ozalimala.
Amalunga ebandla afola evule imilomo ukuthi aginye umuthi lo bewunathiswa ngumfundisi.
Ngemva kwesikhatshana abanye abazalwane baqala ukuqaleka abanye behlabela ingoma zokudumisa uNkulunkulu.
Ekhuluma lephephandaba leDaily Sun umfundisi lo ubike ukuthi isikhathi lesi yisikhathi sokusiliswa kwabantu.
“Lesi yisikhathi sokuthi abantu abagulayo basile njalo imithi le izabasilisa. Akulanto engavimba endleleni yeNkosi lentando yakhe ebantwaneni bakhe.
Lanxa abanye abazalwane bazonda bagana unwabu abanye babelokhe bemdumisa.
Omunye wabazalwane ubike ukuthi “umfundisi lo ulesiphiwo njalo ubezama ukuveza ukuthi uNkulunkulu kehlulwa lutho.
UNkosazana Ntsiki Boleo uchothoze kakhulu isenzo somfundisi ngoba singaba yingozi.
“Nxa unganatha umuthi lo obulalayo ngalindlela uyagula kumbe ufe. Loba ungasagulanga sokungakuhlupha empilweni.
“Singadla njani umuthi wamagundwane? Yikuhlanya nje konke lokhu. Ngiyalitshela abantu bazafela ebizweni leNkosi.”
Ababona ngokuvikela amalungelo ezokholo babone isenzo lesi kuyinto engalunganga njalo bathi amabandla kumele afakelwe imithetho.
Isikhulumi sababona ngamalungelo ezokholo uMnumzana Mpiyakhe Mkholo uthe “sesidlulisele phambili ukukhangelwa kwamabandla kubaphathi abakhulu belizwe ababona ngezokholo.
“Akula esingakutsho ngoba yibo esebekhangela ngendaba ezinjalo,” kuchaza uMnu Mkholo.
UDokotela Mpho Mushadu oweNdofaya Mall Medical Centre eSoweto ubike ukuthi imithi le iyingozi kakhulu.
“I-Rattex le-domestos yimithi eyingozi kakhulu ebantwini. I-Rattex ile-warfarin okokuthi umuntu engayiginya iyamenza aphele igazi ngaphakathi. Lokhu sokungenza ukuthi umuntu aqhatshe abanye sebengopha igazi baze bafe ngenxa yalokhu.
“I-domestos yona iyabulala ezinye izitho zomzimba njalo itshise isisu okuyinto ebulalayo,” kuphetha uDkt Mushadu.
