uMthunywa
Nomthandazo Ndlovu
KULOMFUNDISI webandla lesiPostoli eMakwasha edolobheni leZvishavane obaleke watshiya isithunzi sakhe sebanjwe lomfazi womzalwane ongena ibandla lakhe.
Lesisiga esitshiye izakhamizi zelokitshini leli zibambe owangaphansi senzakale ngoMgqibelo weviki ephelileyo lapho uMnumzana Godfrey Vambe athole umkakhe uTinevimbo Tembo elomfundisi uTafirenyika Mudau ekamelweni labo lokulala wabaleka ebhunyumunyu.
Ekhuluma loMthunywa uNkosazana Sarah Mhlanga ongumakhelwane kaVambe uthe okwenzakala lapho kwatshiya uzulu emangela umfundisi webandla ebaleka ngesudu yakhe yokuzalwa ibhemba isilihlezi emuva.
“Engikubone ngelanga leliyana, lokhu ngingela nkani, thina sabona ngoMashayamombe engena emzini wakhe ngemva kwemizuzwana nje sabona umfundisi esephuma inyawo zithinta esiphundu uVambe emhlezi izithende ethwele ibhemba etshinga esithi uyamdelela.
“Lapho sahle sabona ukuthi indaba ingaphi ngoba nxa umuntu ephuma emzini wenye indoda enqunu kukhona okuyabe kukhona, mina ubaba lo wake wangenzela imithandazo kodwa khathesi sengisesaba lokumbiza mfundisi umuntu owenza ihlazo elinje. Ngihle ngalahla lamanzi akhe la anginika wona,” kuchaza uNkszn Mhlanga.
UNkosazana Tembo ebuzwa ngodaba lolu uthe yena asiqiniso ukuthi ubethandana lomfundisi ubemncedisa nje ngemikhuleko ngoba bekulohlupho alalo.
“Abantu balamanga ukuthi umkami ungithole ngilomfundisi sisenza ucansi, umfundisi ubengivakatshele ezongithandazela kuphela ngoba ngilenhlupho ezifuna imithandazo,” etsho ecitsha ucingo lwakhe.
UMnu Vambe yena uthe umkakhe kasafuni lakumbona emzini wakhe ngoba umdelele kakhulu.
“Umama lo kuphelile okwami laye, bengisanda kumthatha njalo silomntwana olomnyaka sonke kodwa sengisola lokuthi ngowami umntwana lo ngoba kukhanya kaziphathanga.
“Ngangivele ngisizwa ukuthi kukhona okukhona phakathi kwalaba ababili, ngakho ngathi ngiya eMashava mina ngikhona yikho ukubathola kwami bebonke ngahle ngabona ukuthi lapha umuntu ubedlala ngami, bengimangala lemithandazo yonale okuthiwa uyenzela umkami kanti abantu bayaganga,” kutsho uMnu Vambe.
UMfundisi uMudau yena uthe kakwazi ukuthi intatheli ikhuluma ngani qede wacitsha ucingo lwakhe.
“Mina angazi ukuthi ukhuluma ngani, lokhu okutshoyo ngabantu abafuna ukungcolisa ibizo lami kuphela, angiyazi indaba enjalo mina,” etsho ecitsha ucingo lwakhe umfundisi uMudau.
