Umbuzo ngomkhonto ogwaza ekhaya kwabePSL

23 Aug, 2018 - 00:08 0 Views
Umbuzo ngomkhonto ogwaza ekhaya kwabePSL

uMthunywa

KUNGENZEKA yini ukuthi kukhona esingakwazi okutshelwe abadlali ngomklomelo ozanikwa umdlali okunguye ozabatshaya bonke emkhanda ngokuwugwaza ekhaya umkhonto kulisizini ye-Absa Premiership ka-2018/2019?

Kuze kube lamanje bane abadlali asebeliqabulise inethi ngasekhaya loba isizini isephansi. Kungakho kuvela umbuzo ngokuthi ukhona yini umklomelo wokuwugwaza ekhaya ozanikwa umdlali ekupheleni kwesizini.

Indaba yokuwugwaza ekhaya umkhonto ibisematheni langesikhathi kudlalwa iNdebe yoMhlaba eRussia.

Isibalo samabhola angene ngasekhaya eRussia siphindwe kabili okuyisona ebesiyirekhodi lamabhola ayisithupha angene enethini kungafanelanga kunkezo yoMhlaba eyayiseFrance ngo-1998. ERussia abengu-12 amabhola angene ngephutha umdlali elitshaya ngasekhaya.

Lesi isigaba esikhulu sePremier Soccer League (PSL) sibukeka sisendleleni ekhangele ekuphuleni amarekhodi uma uzoqaphela ukuthi ngemuva kwemidlalo emithathu loba emine sekulomdlali osewatshaye aze aba mabili amagoli ngasekhaya.

UGledwin Shitolo we-Orlando Pirates utshiywe ngaphandle engalimalanga iqembu lakhe lithelwa othulini nge 1-0 yiBloemfontein Celtic ngeSonto. Kungenzeka ukuthi uMilutin Sredojevic ubembeke ngaphandle ngoba esaba ukuthi uzophinda akwenze bevula isizini leHighlands Park. Akubanga liphutha lakhe kodwa nguWayne Sandilands owenza into engakaze ibonakale kodwa ibhadi lasala loShitolo ngoba ibhola libhalwe ngaye.

Langesikhahti betshaywa yiBidvest Wits nge 1-0 ibhola lithinte yena uShitolo ngaphambi kokuthi lidle uSiyabonga Mpontshane. Akayedwa lapha uShitolo ngoba uDaniel Cardoso weKaizer Chiefs wenze okufanayo eyeka ibhola ukuba ligqome phansi wase ezama ukulungisa lelo phutha ngokuphambanisa unozinti wakhe u-Itumeleng Khune lebhola bengqikilana leBaroka FC.

UGaona Modisane weChippa United isimo sakhe sicitshe sifane lesikaShitolo ngoba yena ibhola alihlohlileyo litshaye ngasekhaya.

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds