Umbuso weBosso ngokabani?

19 Jul, 2018 - 00:07 0 Views
Umbuso weBosso ngokabani? UKenneth Mhlophe

uMthunywa

Nkosilathi Sibanda
UKENNETH Mhlophe uzahlangana labalandeli beHighlanders ngeSonto esethula umbiko wakhe wakuqala lokhe waba ngumgcinisihlalo waleliqembu.

UMhlophe ukhangelelwe ukuthi akhulume kabanzi ngekusasa yaleliqembu, ikakhulu kwezokubanjwa kwesisekelo sombuso.Ngenyanga edluleyo iBosso yenza imbuthano yokuhlaziya impumela ngesisekelo sombuso.

Okwenza abalandeli bangezwani lesisekelo sombuso esitsha yikuthi asitshiyananga lesidala lapho ibhodi ebiphiwa amandla ukwedlula iqula le-executive.

Kukhangelelwe ukuthi kutshise inkundla ngeSonto kusethulwa loludaba.

Bakhona njalo abalandeli beqembu elikhulu iHighlanders abakhalaza ngokuthi iqembu kumele lilungisise udaba lwesikhwama semali. Kuyaziwa ukuthi leliqembu lilezikwelede eziyingqwaba.

Ngokungena kwakhe esikhundleni uMhlophe wathembisa ukuthi uzaletha amacebo okuthi iqembu lehlise izikwelede.

Kusenjalo, iphephandaba likazulu lixoxisane lamalunga oqobo aleliqembu abike ukuba ngaphandle kwesisekelo sombuso, kunengi okuzahlafunwa kumhlangano lo.

Abalandeli boqobo laba bathe bazacela ‘abadala’ bethimu ukuthi balandelisise isimemezelo sekhansili sokuthi inkokheli zeqembu zilobe incwadi zicela uSodolobho wakoBulawayo lamakhansila ukuthi banikeze iqembu umhlabathi.

Ngomnyaka ka-2016 uSodobho wakoBulawayo uMartin Moyo wafuqela ingqobe kubakhokheli beBosso wabakhuthaza ukuthi bacele umhlabathi wokwakha inkundla.

USodolobho uMoyo ngaleso isikhathi wabika phambili kwenkundla esithi: “Ngingakatshiyi umsebenzi, ngizathanda ukuthi ngifice ehofisini yami kulencwadi evela kuHighlanders icela umhlabathi wokwakha inkundla,” nguMoyo lo.

Imibono yabalandeli igcwele ebulenjini lapho okuvele ukuba inkuthazo kaSodolobho uMoyo izwakele.

UCosmas Malaba olilunga leBosso eseZvishavane ubike ukuba nxa inkokheli zeqembu zingekela ukulandela lokho, ziyabe zehlulekile.

“Okutshiwo nguSodolobho sivumelana lakho sibili. Sekuyisikhathi eside iqembu lethu lithwala nzima ngokubhadaliswa imali ezinengi nxa liqhatshe inkundla zabanye abantu . . . singehluleka khathesi, angeke silunge.”

UMoses Maraha Nkomo oweHwange uthe kuyabongeka ukuthi ikhansili yakoBulawayo isikhululekile ukuthi inikeze iqembu elikhulu umhlabathi.

“Umhlabathi siyawufuna. Iqembu kumele ligijime lidinge usizo kwakhiwe okungokwethu,” nguNkomo lo.

Eqinisa amazwi akhe okusekela iHighlanders, uMoyo uthe: “Njengekhansili yedolobho lakoBulawayo sitshisekela ukuphakamisa ezemidlalo njalo sifuna ukubona iHighlanders iphumelela.

Ukwakhiwa kwenkundla kubonakala kuyindlela ezancedisa ukuthi iHighlanders ingalahlekelwa yimali nxa idinga inkundla zokudlalela lokulolonga.

Kuze kube lakhathesi, iHighlanders yilo lodwa iqembu elizimele lodwa kuleli elilamawofisi, indlu yabadlali kanye lendawo yokubuthana kwabalandeli labathandi bayo.

NgeSonto kuzahlafunwa indaba yomhlabathi wenkundla kanye lokuthegiswa kwama- shares eqembu.

Kuzakuba yindaba esegudwini ukuthi iHighlanders kumele ithengisele labo abalemali ukwenzela ukuthi iqembu lebhola leli libe lengqubekela phambili kunhlelo zayo kanye lokubhadala izikwelede.

Umsekeli omkhulu weqembu uTshinga Dube ngomunye walabo abavumelana lalokhu. Ukuthegiswa kweBosso lokhu kubizwa ngokuthi yikwabelana ama-shares okubamba intambo kwezikaMagebhula.

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds