uMthunywa
IKHANSILI yakoBulawayo, iBCC kumele ithole isicoco saphezulu ngokuba yiyo yodwa ikhansili eyenza umsebenzi ngokufaneleyo.
Ukuthengwa kwemitshina yokulungisisa imgwaqo kuthokozise izakhamizi ezinengi ezikubona kulicebo elihle.
Izakhamizi zithokoziswa yikuthi sekuhambeka kweminye imigwaqo lapho ebekugcwele amagodi.
Umanisipala wakoNtuthu ukhuthuze isikhwama wathenga imitshina ebiza imali engange $1 miliyoni.
Sekuyisikhathi izakhamizi zikhala ngokuthi ikhansili idlalisa imali yazo ngokuvusa impilo zinkokheli zepolitiki, khathesi kubesegcekeni ukuthi intando yabantu yenziwe.
Imali ezikhitshwa yizakhamizi ekubhadaleni irenti, amanzi lokunye, zisetshenziswe ngemfanelo ngokuthengwa kwemitshina ye$1 miliyoni le. Kuminyaka edluleyo bekusiba buhlungu ukutshelwa ukuthi ikhansili yakoBulawayo isithengele usodolobho uvava lwemota. Bekuyimvama ukuthi kungalungiswa imigwaqo kodwa usodolobho anikezwe umthwepha wemota.
Izakhamizi aziqaphele ukuthi ikhansili ngeyazo njalo kumele ziyitshele lokho okumele kwenziwe.
Ngokunjalo ihlombe litshayelwa zona izakhamizi ezakhankasela ukuthi kulungisiswe imigwaqo.
Njengoba isiqalile ukwenza izifiso zabantu, ikhansili le ayenze okufanayo kwelizayo.
Loba zikhona inkinga ezibhekane ledolobho leli, akuphikiswa ukuthi isimo semgwaqo besidida inengi lezakhamizi labavakatshi.
Siyavuma ukuthi $1miliyoni le ibingakha lesibhedlela kumbe izikolo. Imgwaqo layo ibalulekile kwezentuthuko.
Kungumbono kaMthunywa ukuthi ukuqala kokulungiswa kwemigwaqo lokhu kuzatshiya ingqobe kwabanye, ikakhulu osomabhimusi.
Ikhansili le igcwalisise isithembiso sayo ekuqaleni kwawonalo umnyaka. Ukulungiswa kwemigwaqo yakoBulawayo kusekele uhlelo kulaHulumende olweZimbabwe Agenda for Socio-Structural Economic Transformation- iZimAsset.
Ngaphansi kwe-ZimAsset kukhuthazwa ukuthi izakhamizi zeZimbabwe kuyo yonke indawo ziqale ukuzenzela njalo zincedisane loHulumende ekuthuthukiseni isizwe.
IBCC lezakhamizi zakoBulawayo zikwenzile lokho ngokuthenga impahla ye$1miliyoni le, ukuthuthuka kwakoBulawayo yikuthuthuka kweZimbabwe.
Iphephandaba likazulu likholelwa ukuba ikhansili yakoBulawayo itshiye umzekeliso omuhle kwamanye amakhansili izwe lonke.
Kuyaziwa ukuthi umkhonomi wesizwe usatotoba, kodwa nxa ikhansili yakoBulawayo isenza kanje, kutsho ukuthi izizalwane zakuleli zingenza okungcono kuhlelo lokuvuselela isizwe.
Abatshayeli bezimota koBulawayo besebekhipha inkalakatha zenhlamba kubaphathi bekhansili ngoba imgwaqo yakoBulawayo isibulala izimota, ifaka impilo zabantu engozini njalo.
Kuliviki izisebenzi zeBCC ziqhubeke ngokusinda imigwaqo ethile emalokitshini, okuyikhona okuveza ukuthi imitshima emitsha ithengelwe ukuthi isetshenziswe ukuphathisa uzulu.
Okumqoka ngalokhu yikuthi nxa imigwaqo isilungisisiwe, eminye imsebenzi izakubalula. Amabhizimusi akulelidolobho lawo asekubona ukuthi kuyasebenzeka koBulawayo.
Idolobho lakoBulawayo lilemigwaqo efika amakhilomitha angu-2 075 njalo yonke imgwaqo ibhobokile.
Ngokutsho kukasodolobho uMartin Moyo, kufuneka imali engange $700 million ukuze kulungiswe imgwaqo ithi cwaka- njengakudala.
Phakathi kwempahla le, kulamaroli, ama-grader, ama-dozer, exacavator lezinye izimota ezitshenziswa ekulungisweni kwemigwaqo.
Imgwaqo ezalungiswa kuqala kuleminye ibalisa uJukwa elokitshini leLobengula West, Entemba loHuggins oseLuveve, Siyephambili, 23rd Avenue loNgcebetsha.
Ukwenza intando yabantu lokuncedisa uHulumende ekuthuthukiseni isizwe. Amakhansili awasebenzise imali zezakhamizi ngemfanelo langendlela esegcekeni ukuthi kusuthiseke umuntu wonke.
Njengoba sekunuka ithara entsha emgwaqweni, ikhansili yakoBulawayo ikhuthazwa ukuthi yenze kuhle njalo kudaba lokwabiwa kwezindlu lezitanda.
