uMthunywa
ABADALA bathi elokufa alitsheli, likuthola utshonile ungela yona indibilitshi, yona eyokuthenga itamatisi uze uthi ake ngiyezama kumakhelwane ngizamnika inyanga iphela sengiholile. Yikho-ke lapho okuqala khona indaba, phela nxa usuyibambile ezandleni ukuthi uyidlulisele komunye ubona sulahlekelwe okwenza uhlale ubalisa ngokubhadala leso sikwelede.
Bakwethu asizameni ukubhadala izikwelede zabantu, akukuhle ukunyela emthonjeni onatha kuwo, uzaboleka kubani kusasa sulodubo? Ungathi ngoba sekuncedile umuntu uthi ngiyabe ngisafunani kuye, uzamdinga kusasa sebekulahlile abanye bonke. Lowomuntu uyabe ekuphe imali yakhe ngokukuthemba ngakho nxa sokumele uyibisele imali yakhe thembeka.
Yebo, sihlangana lazo inkinga zemali elizweni lethu leli kanye lempilweni nje jikelele kodwa mtshele phela umuntu iqiniso ukuthi awukayitholi kulokuthi uthi ungumuntu omdala uzwakale sutshela abantwana ukuthi “ uSaMaMo angafika engidinga lithi angikho,” wena utshaye amangqetshane endlini. Akukuhle lokho ngoba umthembisile umuntu ukuthi ngiyakunika ngelanga elingaka, nxa ungakayitholi mtshele iqiniso, laye ngumuntu, uzazwisisa. Kwakube nzima kakhulu nxa weboleke isihlobo umuntu uvele azithulele ingani kalalutho lwakho. Umbuza uthini uyihlomncane loba udadewenu?
Amanga lawa yiwo acina esenza abantu baloywe bacine betshintsha besiba zindwangu, abanye umuntu ubaleka lesikwelede senyanga, uyabe usithi uzafika ngaphi? Ubalekela umuntu okuncedileyo, kambe buyabe sebungaphi ubuntu Mthwakazi?
Yebo siyababona ababaleka lezikwelede zabanye beqamba amanga, kodwa lani elikweledwayo buzani kuhle imali zenu, lingethuseli abanye. Abanye umuntu imali uyabe engelayo sibili ekutshela ukuthi angikayitholi kodwa wena ube ulokhu umthwalise nzima, uthi ayitshontshe yini? Uzafika ekuseni umuntu esithi ulande imali yakhe uthi awula usadinga, dukuduku akukahlali lemizuzu emingaki sethume umntwana futhi, yikho umuntu ecina ekucatshela.
Khona nxa umuntu elesikwelede sikamakhelwane kumbe esikamasitanda sesesaba lokubonakala ethwele inyama loba isinkwa, sethenga afake esikhwameni sezigqoko esesaba ukuthi kuzathiwa udla inyama elesikwelede sami? Sokumele umuntu alambe yini ngoba ulesikwelede sakho? Hayi zinzima-ke indaba zemali. Iyimpande yesono yona ngoba ikwenza ucine uqamba amanga, loba ufisele lo olesikwelede sakho bonke ububi nxa engasakuphanga imali engeyakho.
Imali sixabanise inengi, imizi layo iyachitheka ngesizatho esifanayo, kungakho kubalulekile ukuthembeka nxa uthe wabolekwa imali. Ngempela iyimpande yesono imali.
