uMthunywa
AKULA mzali opha umntanakhe izinto abona ukuthi azimfanelanga kumbe azimlingananga. Abazali banika abantwababo lokho ababona kubafanele, ngeke umzali aphe umntwana into ezamenza abe yinhlekisa kwabanye abantwana, akwenzakali lokho.
Kungakho lathi njengabantu siphila emhlabeni uMdali ngeke asiphe okungasifanelanga, lo lalo uphiwa okumlingeneyo, kulesizatho sokuthi kungani wena uphiwe okungafani lokomunye. Umuntu angasoli lokho akuphiweyo, ngoba yikho okumlingeneyo.
Kuviki ephelileyo kulomama ositshiyileyo ngemva kokunatha amaphilisi okukhulisa izinqe, okuyinto ezwisa ubuhlungu kakhulu ukuthi lezo alazo ubesezisoleni umuntu weNkosi, aze anathe amaphilisi anjalo acine semtshiyisa amabele. Umuntu kamukele lokho ayikho khona, asibunjwanga safanana bakithi, yena owathi izinqe yizo ezenza umuntu wesifazane abemuhle ngubani? Yebo, bayabathanda obaba omama abalezinqe ezithe xaxa ngoba phela kuyabajabulisa ukukubona.
Bakhona obaba abangazithandiyo izinqe bomama, abafani obaba, bakhona abathanda omama abalingeneyo nje, ngeke kwenzeke ukuthi obaba bonke bagijimele izinqe nje, bakhona lawe abazakuthanda ulomzimba wakho wonalo olawo. Kuyingozi ukusebenzisa amaphilisi lamajekiseni la atshintsha umuntu abengokunye, okungapheliyo kuyahlola phela, izaphela imali yokuthenga lezo zinto, nxa usuyiswela imithi le uzabona iziga wemuntu wesimame, abanye ngabaqala ukuhlubuka izikhumba zomzimba njengenyoka lemipankwa. Ngubani-ke osezafuna umuntu onjalo? Umuntu kumele athande wena ngokwakho, yamukela oyikho khona, umuntu akuthande unjalo.
Yena owathi intombi enhle ngebomvu ngubani, lawo ma-yellow bone adume kangaka. Mthwakazi, singabantu abansundu, asizigqajeni ngobunsundu bethu, asizigqajeni ngesikhumba sethu lesi esihle esibukekayo. Singagijimisi imithi yokuza le yabantu abafuna ukwenza imali kuphela befaka impilo zabantu engozini.
Singagijimisi ukuhuga abesilisa siphazamisa ubuhle bethu esibuphiwe nguNkulunkulu njalo sifaka lempilo zethu engozini. Umuntu kutsho ukuthi uyabe sesola ukuthi uNkulunkulu umdale njani, usolani we muntu, bonga lokho odalwe waba yikhona, ubonge lempilo oyiphiweyo, hatshi ukutshona ugijimisana lobuhle bokuzenzela, obuzakwenza usale suyinunu ucine subalekelwa ngabantwana.
Bomama, singazifaki emikhuhlaneni ngenxa yokufuna ukuhuga abantu besilisa, abafani lababantu, bafuna izinto ezitshiyeneyo, kwazi bani, mhlawumbe lalaba abalezinqe lezo ezikhulileyo lababomvu bayafisa ukufana lani lina elifuna ukuba njengabo, kungakho kuqakathekile ukuthi umuntu ngomuntu amukele lokho ayikho khona, kulesizatho uNkulunkulu wakudala njalo.
