uMthunywa
ABANTU kumbe izinyamazana zifa njalonje ngenxa yezingozi zemigwaqo. Nxa sekwenzalale lezi ngozi kakho ovumayo ukuba uphambanisile. Omunye lomunye usola omunye esenzela ukuba angadliwa licala.
Lokhu akulunganga ngoba leyo ngozi iyabe ivele isenzakile ngakho kuyabe kumele kube leqhinga lokuvikela izingozi esikhathini esizayo ukwenzela ukuba abantu bengafi mahlayana nje.
Ngesonto kuyonale iviki kulomtshova obhewuke emgwaqweni osuka enzikini yakoBulawayo usuya elokitshini leNketa kwalimala abantu abangu-16.
Umtshayeli wasola umgwaqo kunye lemota yakhe wathi yikho okubangele leyo ngozi.
Ungananzelela amaphephandaba ahlala equkethe indaba zezingozi zemigwaqo mihla yonke okuyikho okutshengisa ukuba izingozi lezi sezitshabalalise uluntu.
Ekubhaheni kwezingozi lezi, kulezizatho ezinengi ezandise ukuba yimbangela yalezi ngozi. Abanye babasole umtshayeli, abanye basole, isimo semigwaqo abanye basole amapholisa kukanti abanye basola yona imota ngokwayo. Kanti vele olecala ngubani?
Kanengi nxa isenzakele ingozi, akekho owuvuma kalula umlandu. Abantu bajikelana inyoka iphila,bakhombana ngeminwe ngoba engekho ofuna ukuthwala umlandu nxa sekuthe kwenzeka isehlakalo sengozi.
Abanye bavele banyamalale, umuntu angene phansi njengomswenya.
Ukulwa lokuphikelana lokhu akusizi ndawo Zulu omuhle. Kusenza sibukeke njengabantu abangakhulanga engqondweni njalo abangaziyo lapha abasuka khona lalapho abaya khona.
Abanye abantu kungakhulunywa ngembangela zezingozi kungani kusolwa iqembu akulo, okungaba ngelabatshayeli, amapholisa kumbe laba abasizana labatshayeli, umuntu uvele avuke ubhova angene ngenhliziyo, akuthathe kube sengathi kutshiwo yena uqobo. Sekunjalo laye asole omunye, omunye laye awedlulisele phambili umlandu.
Eqinisweni akula lapho esingaya khona njengesizwe nxa abantu bephoselana inyoka edabeni oluqakethe njengalolu. Bekumele abantu bakithi babonisane ngokuzotha langokuthobeka ukuze kulwiswane laloluhlupho.
Kuqakathekile ukuthi uzulu ananzelele ukuthi ingozi zonke zibangelwa ngusathane. Nguye lusathane njalo obuye athele umoya wokuxokozela lokusolana ebantwini yena abesecatsha ngabathile labathile.
Ngalokhu ke uzulu kumele abambisane ekulwisaneni lalezingozi. Ilo lalo aziphe umlandu wokudala umahluko.
Abagadi, amapholisa labatshayeli basebenzelane bahloniphane njalo. Phezu kwakho konke uzulu kaqaphele iqili elingusathane alwe lalo ngokubambana hatshi ukulwisana thina ngokwethu ukuze sinqobe kulimpi ngoba isikhathi sokukhombana ngeminwe siphelile.
