Uncategorized

Umbono womthunywa: Ukukhulumisana ezindlini kuyinto emqoka

31 Jan, 2019 - 00:01 0 Views
Umbono womthunywa: Ukukhulumisana ezindlini kuyinto emqoka Family argument

uMthunywa

UKUNGATHEMBEKI kwabantu emzini yabo sekubangele ukubhidlika kwemizi kunye lokuhlupheka kwabantwana abanengi elizweni.

Inengi labantu abatshadileyo njalo asebemise imizi yabo emihle emadolobheni kunye lasemaphandleni basuka bahugwe yizinto ezingelamsebenzi batshiye imuli zabo bethi bayakholisa kanti cha baya kogoqwanyawo.

Ukungathembeki kwendoda lomkayo kuyaphambanisa ukukhula kwabantwana loba bethola konke abakufunayo.

Abanye abazali bayalwa phambi kwabantwababo bathethisane ngenkalakatha zenhlamba kube luthuli endlini kodwa kungabi ndaba zalutho.

Lokhu kungezwani phakathi kwalaba ababili esikhathini esinengi kuyabe kubangelwa yikungathembani kunye lokungakhulumisani kuhle.

Uthola ubaba kumbe umama esephuma emzini wakhe esiyathandana lomunye umuntu ethi uyaziphumuza ukuhlulukelwa okusemzini wakhe kanti cha usephambanisa ngamandla.

Abanye baze baziduduze ngokuthi benza lokhu abakwenzayo ngenxa yokuthi bafuna ukuzijabulisa empilweni yabo ngoba bengabulawa yikucabanga kakhulu.

Akusamangalisi ukuthola amanina emizi etshukana ledlalicatsha ayabe esethole ukuthi lithandana labomkabo.

Uthola abanye abantu bengabazwela umama womuzi kuthi abanye bengabazwela lelidlalicatsha.

Ngenxa yalokhu inengi lemizi iyachitheka itshiye abantwana beyimihambuma belala ezitaladeni.

Abanye njalo abangenelisiyo ukuphila ngendlela embi bakhetha ukuzibulala benatha imithi kumbe bezibophela.

Konke lokhu kubangela ukukhathazeka kunye lokuhlupheka okukhulu kulaba ababukeleyo ikakhulu abantwana bona abayabe bengonanga lutho.

Abantu abaphila legcikwane lengculazi baya besanda elizweni ngenxa yokwehluleka ukukhulumisana kwabantu ababili nje.

Kukanti bekuyinto enhle ukuthi abantu bakhulumisane nxa kulokungazwisisani okuthize phakathi kwabo.

Akulabunzima obungalungisekiyo nxa abantu bezimisele kodwa okusuka kube nzima kuphela yikuthi umuntu nxa elensolo usuka akhethe ukuzithulela ethi akunani kanti enhliziyweni uyabe evutha.

Kukanti uma angakhulumisana lomunye wakhe, babonisane ngodaba olungabe luyabahlupha kuba kuhle kube njeya.

Inengi labantu abatsha abatshadayo kulezi insuku alisahlali iminyaka engaba litshumi betshadile.

Bayaqala ukulwa, ukuthethisana anduba behlukane.

Yebo kudala izinto zisahanjiswa kuhle indoda lomkayo babethi bengaxabana behluleke ukukhulumisana kuhle badinge isihlobo abasethembayo sizobalungisela udaba olubahluphayo kodwa lokhu akusekho khathesi, abantu bangaxabana yilowo lalowo usethwala imitshaqana yakhe azihambele.

Kuyadanisa ukuthi inhlanganiso ezigcina intandane zilokhu zisandelwa ngabantwana hatshi abazintandane kuphela kodwa laba labazali abasuke bababalekela.

Pho ilizwe lethu eleZimbabwe lizabe lisakhangeleka na eminyakeni ezayo uma abantu bengaphanganga bazinikela ekulungiseni loluhlupho.

Abadala batsho beqinisile nxa besithi akulamuzi ongathunqi intuthu, kodwa phela nxa uthunqa intuthu akutsho ukuthi abantu abasathandani sebengabhidliza izithukuthuku zabo babulale lempilo yengane zabo.

Nxa abantu bethandana njalo bekhulumisana abangeke badlalelana umacatshelana loba sekutheni.

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds