uMthunywa
INENGI labantu elizweni liyahlukuluzwa ngoba kalazi amalungelo alo.
Uthola umuntu ehlukuluzwa kodwa ezithulela ethi akunani kukanti umthetho ulakho ukumvikela.
Kudala yebo kwakungadingeki ukuthi abantu bavule amabhuku omthetho ngoba kwakuvele kulokuhloniphana kodwa ngenxa yokuguquka kwezinto inengi labantu selaguquka lalo, selithatha umthetho liwufumbathe ezandleni.
Lokhu sekubangele ukuthi ilizwe libe liguqula imithetho yokujezisa izigilamkhuba ukuze lizame ukuzifundisa ukuhlonipha abanye.
Kule iviki kunkundla zokuxhumana kusabalale ividiyo yabosaziwayo ababili abadumileyo kwezomculo elizweni leSouth Africa uMandla Maphumulo odume ngokuthi nguMampintsha kanye loBongekile Simelane odume ngokuthi nguBabes Wodumo. Kuvidiyo le kubonakala inkalakatha yendoda le, enguMampintsha itshaya intombi yayo ngezibhakela. Lokhu kuveza sobala ukuthi ukuba ngusaziwayo akutsho ukuthi lowomuntu ngeke ahlukuluzwe kumbe ngeke ahlukuluze omunye umuntu.
Kukhanya umculi lo ubeselesikhathi eside ehlukuluza umkakhe kodwa kungaphumeli egcekeni ngoba umkakhe mhlawumbe ebelenhloni zokuchaza ukuthi uyahlukuluzwa. Ukuthi uyahlukuluzwa kayisiyonto eyangisayo ngitsho, kungakho nxa uphakathi kobudlelwano obunjalo kuhle ukuthi uphumele egcekeni ukuze uthole usizo ngoba ukuhlukuluzwa lokhu kungacina kuphetha ngesidumbu phansi.
Ukuhlukuluzana emakhaya kukhona njalo akukhethi kungaba ngowesilisa ohlukuluza owesifazana kumbe labantwana kumbe njalo kungaba ngowesifazana ohlukuluza owesilisa. Kungaba ngusaziwayo kumbe umuntu ohloniphekayo kakhulu ohlukuluza omunye loba njalo kube ngumuntukazana nje ohlukuluza abanye. Ukuhlukuluzana kukhona zonke indawo. Kungakho-ke sithanda ukuphathaphatha ngokuhlukuluzana emakhaya kanye lamalungelo omuntu nje.
Ngesikhathi kusabalala ividiyo le abantu emazweni ehlukeneyo bachothoze ubudlwangudlwangu bukaMampintsha okwenze waze wabotshwa.
Banengi abasemakhaya abaphakathi kokuhlukuluzwa okwehlukeneyo kungakho-ke kuyadingeka ukuthi emazweni imithetho ilungiswe njalo ibe lezigwebo eziqinileyo okuzakwenza kuphele ukuhlukuluzana phakathi kwabathetheneyo.
Umthetho wakuleli awukuvumeli ngitsho lakancane ukuthi kube lokuhlukuluzana. Kuyadingeka ukuba nxa ekhona ohlukuluzwayo emulini loba engaba ngumakhelwane umncedise ukuze abe lesibindi sokuyabikela amapholisa kungakaze konakala.
Inengi labantu, ikakhulu abesifazane, sebekuthatha ngokuthi bavele bona bamele batshaywe ngomkabo kukanti cha umthetho uyakwala lokho njalo uyabavikela. Akulamuntu olemvumo yokuhlukuluza omunye umuntu amthathele injabulo kunye lokukhululeka elizweni.
Kuyadingeka njalo ukuthi abomthetho labo bafunde ukwamukela kuhle labo abafika enkambeni ezehlukeneyo bebika ngokuhlukuluzwa hatshi ukuthi kube yibo asebechothoza lowomuntu.
Kungakho-ke abantu kumele bavuse amakhanda bangavumeli izikliwi zisenza ezikuthandayo kibo.
