Uncategorized

Umbono woMthunywa: UHulumende kavikele abantwana ekuhlukuluzweni ezikolo

14 May, 2015 - 11:05 0 Views

uMthunywa

umthunywa

AMAZWI abadala athi uthango ludla amakhomane asebonakala egcwaliseka mihla yonke kulezinsuku. Kubuhlungu ukubona abantu okumele bavikele abantwana sebeyibo ababahlukuluzayo.
Kulezinsuku amaphephandaba agcwele indaba zabazali, izihlobo kunye lababalisi abahlukuluza abantwana emacansini.

Ngenxa yokwanda kwabantu abadlova abantwana, sekunzima ukuthi abantu bethembane. Abazali sekunzima ukuthi bethembe izihlobo zabo ikakhulu ngempilo zabantwababo.

Sebebalutshwana abantu abavumayo ukuthi abantwababo bagcinwe yizihlobo ngoba besesaba ukuhlukuluzelwa abantwababo.

Kwesinye isikhathi ababalisi, abayibo abathatha isimo sabazali ngesikhathi abantwana besesikolo basuka baphenduke izitha zabantwana. Lokhu kusuka kudide ingqondo ukuthi pho abantwana bazavikelwa ngubani?
Usizi olukhulu yikuthi abanye balaba babalisi abaxhwalileyo ngobaba kunye labomama abakhulileyo, abazeleyo.

Kuleliviki kulomunye umbalisi odlove umntwana oleminyaka engu-10. Kambe kusani lokhu? Bona bangakukathakazelela yini nxa isenzo leso singenziwa kwababo abantwana?

Kuqakathekile ukuthi umuntu nxa esenza okuthile komunye umuntu azibuze ukuthi yena angezwa njani nxa lokho kungenziwa kuye.

Amanye amanina alenhliziyo ezimbi, kabalaso isihelo.Endulo umzali wayehlonitshwa ngoba elesimilo kunye lesithunzi emphakathini. Kulezinsuku umntwana angaze abelohlupho kunzima ukuba abikele umbalisi kumbe esinye isihlobo ngoba laso singacina simdlova.

Okunye okulusizi ngaloludaba yikuthi phezu kokubahlukuluza emacansini, abantu laba babuye basethusele, babathembise ukubabulala nxa bengabaceba kumbe babikele abanye ngalokhu abayabe bebenze khona.

Umhlaba usutshabalele bakithi. Umbuzo okhona yikuthi siyangaphi njengesizwe nxa izinto zisenzakala kanje?

Esikhathini esinengi izikliwi ezenza ukuganga lokhu yizihlobo eziseduze kakhulu. Abanye abantu baze bathi kungcono ukuthemba ilitshe kulokwethemba umuntu ngoba abantu sebaphenduka babazinyamazana.

Kuqakathekile ukuthi abantu bazinuke amakhwapha bahloniphe abantwana ngoba lokhu kubulala ikusasa labantwana.

Kungumbono woMthunywa ukuthi ngabe uHulumende uyafaka imithetho eqinileyo mayelana lokuhlukunyezwa kwabantwana ikakhulu ezikolo. Ezikolo kumele ababalisi bananzelele abantwana ngazo zonke izikhathi ukuthi abahlukuluzekanga na emoyeni.

Ababalisi kumele babelobudlelwano obuhle labantwana ukuze babatshele okubahluphayo.

Omunye umntwana uyabe ehlukunyezwa ngekhaya kusuke kubenzima ukuba uzabikela bani ngoba lababalisi bakhona sebaphenduka impisi eziphangayo.

Amapholisa kumele abophe zonke inswelaboya ezilomkhuba wokuhlukuluza abantwana.

Idale lePhalamende lalo kumele lifake imithetho eqinileyo ukuze kwehliswe amacala okudlwengulwa kwabantwana. Lowo ofunyanwe elecala lokuhlukuluza umntwana kumele agwetshwe okuzwayo ukuze lalabo abafuna ukuganga bengakwenzi.

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds