uMthunywa
KULEZINSUKU udaba olutshisa bhe ngolwembanje okubikwa sezizalinywa ngokusemthethweni kuleli.
Ukulima isilimo lesi esijabulisa ontanga kuzavunyelwa nguHulumende kulabo abalezincwadi abazinikwe nguye kuphela.
Osekusuka kumangalise yikuthi inengi lababhema isilimo lesi selijabule labamanzi te ukuthi sebezazibhema bekhululekile kukanti hatshi bakhe phansi.
Yebo, kuthiwa imbanje sezizavunyelwa ukulinywa ngesizatho sokuthi kulemithi edinga isilimo lesi ukuze yenziwe yilabo abapheka imithi hatshi ukuthi labo abathanda izidakamizwa sekumele bazibheme cala celeni.
Kanti ziyisihlahla bani zona vele imbanje? Yisihlahla bani esithi umuntu angasibhema abone indlu eyodwa sezimbili?
Abantu kumele bazi ukuthi kungani uHulumende engazivumeli imbanje, imbanje kazifani ngitsho lotshwala njengoba inengi lisitsho ukuthi konke lokhu kuyadaka, pho ke umehluko ungaphi?
Utshwala lobu obuthengiswa emabhawa buhloliwe ngesikhathi bulungiswa, njalo ngokusemthethweni kumele bunathwe ngabantu abaleminyaka eyedlula elitshumi lasitshiya galombili (18).
Pho-ke imbanje zihlolwe ngubani? Ziyadaka kuphela, akula ngitsho lodokotela oyabe ekwazi ukuthi umuntu ubheme imbanje ezilokudakayo okunganani. Abanye bathi bangazibhema bathi bezwa sebelambe okwamagama umuntu atshaye ibhodo yonke yesitshwala abeke ekhoneni.
Osekuzwisa ubuhlungu yikuthi lensane ezisafunda uthola zisemabholohweni zibhema imbanje lezi kusuke kumangalise ukuthi pho esikolo kuyabe kusafundwani abantu bedakiwe.
Ngeke kumangalise nxa bekhona asebephambene ingqondo ngenxa yokubhema imbanje, phela inengi lingazibhema uthola umuntu sehleka yedwa kungelalanto ehlekisayo ngitsho.
Lesi yisinqumo esihle sibili esithethwe nguHulumende esokuthi loba imbanje sezizalinywa ngokusemthethweni ukuze kwenziwe imithi kuphela hatshi okunye okwedlula lapho. Ukubhema imbanje kuqhubeka kuyinto engekho emthethweni njalo ebophisayo.
Abantu okumele amapholisa kanye loHulumende abahlale izithende yibo labo abathengisa imbanje, bona bevele bezithatha ngaphi?
Yibo laba abalamasimu lezivande zembanje emahlathini lapha thina sisithi abantu baya ezivandeni kanti bayavuna imbanje ezithengiselwa abantwabethu ziphambanisa ikusasa labo.
