uMthunywa
KULEZINSUKU asizigigaba esizibona zisenziwa ngabafundisi bamabandla atshiyeneyo. Uthola abantu belanda umfundisi obenza izenzo ezingabusisekanga uzibuze ukuthi kanti uyabe ebavala ngani abantu ukuthi bengaboni ukuganga kwakhe.
Iphephandaba lakule iviki limumethe udaba lomfundisi obanjwe xhaka ezincindela uluju lwemvelo lomzalwane webandla lakhe amaziyo ukuthi ungunkosikazi othethweyo.
Okuthena amadolo yikuthi umfundisi lo wenze ihlazo leli ngesikhathi besemlindelweni.
Kambe umfundisi onje utshumayela liphi ivangeli nxa esehluleka ukuthiba imizwa yakhe aze abhacwe lonkosikazi womuntu emlindelweni?
Lokhu akusazwisiseki ukuthi kanti vele kuhamba njani ngoba phela ezinkonzweni kunengi okwenzakalayo.
Kwesinye isikhathi uyezwa kuthiwa umfundisi ubonakale ebamba isitho somzalwane sangasese esithi uyamkhulekisa. Kukanengi njalo sisizwa ukuthi bakhona abanye abazalwane abadlwengulwe ngabafundisi bebaqila besithi ukuze babakhuphe amadimoni kumele babathandazele bebakhuphe izigqoko. Kambe noma kuthiwa ngumthandazo uyabe sungonjani nxa sukhupha idimoni ngokungena ecansini lomuntu okhathazekileyo.
Mthwakazi umhlaba lo susiya emaphethelweni, asizameni ukwehlukana lamasonto la angacaciyo owathola egcwele phamu ngoba yikho okwenzakala izigenqugenqu lezi esizizwa mihla yonke.
Ungabona umfundisi webandla lakho umsola baleka ngenyawo zombili ngoba sebekhona abafundisi abagangileyo kulezinsuku. Thina sazi ukuthi inkonzo yindawo ehloniphekayo abantu abangena kuyo begqoke ezihloniphekayo. Lani bazalwane besimame gqokani okuhloniphekayo phela. Lingalingi abafundisi, labo ngabantu benyama.
Uthola umfundisi evumela abazalwane bedumisa iNkosi begqoke izigcebhezana ezitshiya amathanga wonke phandle ngapha ubuso bupendwe kwabanzima. Kambe ungathi yisonto leyo lapho okungena khona abantu abenza kanje?
Asikhonzeni uNkulunkulu hatshi abafundisi bakithi, asilandeleni imilayo elitshumi esayinikwayo hatshi lokho esikutshelwa ngabafundisi. Asitsho ukuthi lingalaleli abafundisi kodwa phela lalela lokho akutshoyo hatshi akwenzayo ngoba laye ngumuntu njengawe.
Isimanga yikuthi “abazalwane” yibo abaya emasontweni la alezigigaba belanda zona lezi zinto ngoba bethanda izimanga eziphangisayo.
Abanye abafundisi sebehlawulisa abazalwane izigidi besithi bazabapha inotho. Wonke la ngamanga, kanti nxa ufuna inotho uyehluleka na ukuthi uzicelele kuMvelinqangi?
UHulumende kumele akukhangele lokhu abophe bonke abafundisi bamanga ngoba bazenzela umathanda bevala ngegama leNkosi bathi bona bazinceku.
