Uncategorized

UMBONO WOMTHUNYWA: Batshayeli qaphelani izingozi emgwaqweni!!

22 Nov, 2018 - 00:11 0 Views
UMBONO WOMTHUNYWA: Batshayeli qaphelani izingozi emgwaqweni!!

uMthunywa

INDLELA abantu abaphela ngayo emgwaqweni kulezinsuku iyethusa. Kumaviki la edluleyo akulalwa abantu bengezwanga ngabantu abatshabalale baphele du engozini zemigwaqo ezitshaqisa umzimba ziphinde zethuse abantu bazibuze ukuthi kambe sokusenzakalani. Sebesesaba lokuvakatsha abantu beNkosi ngengozi zemigwaqo lezi ezenzakala kusa kwamalanga, esezisenzakala njengemidlalo, sihamba imphefumulo yabantu njengeyezinyamazana.

Kusuka kudidanise abantu amakhanda uma bezama ukuzwisisa ukuba kungabe kuyini ebangela ukuthi abantu baphele emgwaqweni. Moya bani osuzunguza phakathi kwethu? Yebo sizathi yimimoya kodwa ezinye izimota ezihamba lapha emigwaqweni hatshi lenqola ingcono, zingena njani imota ezingalunganga emigwaqweni?

Abanye siyazi ukuthi bazagxila ekuthini yimimoya kodwa besazi mhlophe ukuthi indlela abatshayeli bakulezinsuku abatshayela ngayo iyingozi. Kukanengi sisizwa kuthiwa abantu babhewuke ngemva kokukhuza umtshayeli kanengi ngesiqubu ahamba ngaso.

Lingadlali ngemiphefumulo yabantu batshayeli, imota kazilungiswe abantu bahambe bephephile. Abanye abatshayeli abala ngitsho lencwadi ezisemthwethweni zokutshayela, zekele njani ingozi ukwenzakala? Yibo-ke laba abatshayeli abathi umuntu sephakathi kwengozi abantu sebelimele ubone ngezithende sezitshaya esiphundu umuntu setsholobela engena iganga etshiya abantu besifa. Batshayeli hloniphani impilo zabantu ziyadula, ziligugu.

Abanye abatshayeli bagijimisa izimota ingani basemjahweni, kuyini okuqakatheke ukwedlula umphefumulo womuntu okuyabe kugijinyelwa?

Yebo imali sonke siyayifuna akula ongayifuniyo, kodwa lofudu luyafika lapha oluyakhona loba lutotoba.

Imota kazitshayelwe kuhle, okubalulekileyo yikuthi abantu bafike lapha abayakhona, hatshi okunye.

Kungumlandu wenu batshayeli ukubona ukuthi abantu bayafika lapho abaya khona, ngakho kayilandelwe imithetho yemigwaqo ngazo zonke izikhathi. Labo abantu kuqakathekile ukuthi bangagadi izimota okusegcekeni ukuthi zifile, loba sujahe njani kumbe suphuze kangakanani gada imota ephephileyo ezakufikisa lapho oyakhona.

Kungaba licebo elihle nje ukuthi abatshayeli bahlale behlolwa njalo nje, kubelesiqiniseko njalo sokuthi benza i-defensive driving ngoba ibalulekile kakhulu, njengoba sesisondela kukhefu nje kuzaba yini nxa abantu sebeqala ukuphela khathesi?

NgeKhisimusi kuzaba lucaca lodwa lapha emigwaqweni nxa kungabonwanga icebo ngendaba le, bazaphela abantu, baphile njani abantu sebesesaba ukuhamba. UHulumende kabone lokuthi imigwaqo efileyo iyalungiswa, amabhakane atshengisa izingozi eziphambili lawo akhanye kubonakale ukuthi kubhalweni, amanye amabhakane semadala, amanye awile okuyingozi kakhulu kubatshayeli abangajayelanga ukuhamba ngaleyo migwaqo.

Kodwa phela aziqali ngengozi zemigwaqo, lezi ezakulezi insuku hatshi amaKhristu athi yimimoya kaDiyabhulosi-ke le, kukhona okwenzakalayo lapha. Kuyini okuthatha imiphefumulo yabantu ngalolohlobo?

Lapha sokudingeka ukuthi idolo litshaye phansi kukhulekwe, labesintwini babambabambe okwabo umuntu lomuntu abone icebo engathathwa yisivunguzane lesi esithatha abantu.

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds