Uncategorized

Umbono woMthunywa: Akelizithibe masela, lizatshontsha okungatshontshwa khona!!

07 Jun, 2018 - 00:06 0 Views

uMthunywa

ASAZI ukuthi umuntu uyabe sedubeke okungakanani nxa seyatshontshela omunye umuntu lokho akusebenzele iminyaka eminengi yena avele atshontshe nje kungabi ndaba zalutho. Kumbe sithi mhlawumbe umuntu uyabe ephambene ekhanda? Liyakutsho phela leBhayibhili elingcwele ukuthi ukweba yisono esikhulu umuntu okungamelanga asenze, kodwa abanye bayatshontsha bezwisa abanye ubuhlungu.

Phela ukutshontsha kuqala ngento encane nje, yikho-ke lapho okumele uzame ukukulwisa utshaye ngedolo phansi ucele kuMdali akuncedise ekulwiseni isilingo lesi ngoba ungekela ukutshiya ukweba lokhu kuzakonela impilo yakho kwenzeke amashwa angalunganga empilweni yakho uthi mhlawumbe kuyakuhlolela.

Kambe nxa umuntu ezaphuma endlini yakhe ekuseni avalelise imuli yakhe sibili athi uya emsebenzini esitsho ukuyatshayela abanye abantu izikhwama uyabe ephelele engqondweni? Kwehlulani ukuthi uthengise amatamatisi lemibhida njengabanye, loba kungeneli lokho okufunayo kuzalunga ngelinye ilanga, wonke umuntu uqala phansi. Wena ungumuntu onjani ofuna ukuvuka ulele uyetshontsha imisebenzi yabanye abantu beginqa beginqela wena ukuthi uzotshontsha.

Nansi-ke indaba, nxa lawe ungomunye walaba abalezandla, abaledimoni lokutshontsha. Lizafika eliyisilima, lapho-ke ozabona ukuthi loba sekutheni ngeke lizikhothe emhlane iqili. Uzatshontshela abangatshontshelwayo, abangeke bakumele ukuthi bona bayasebenza ngamandla abo onke besebenzela imuli zabo wena ubuye ngokuhluthuna kuphela.

Banengi esihlangana labo sebeyizilima, abanye sebehlanya sizwe ngabantu sebesithi wayelisela elidumileyo bamlungisa abaziyo. Uthole umuntu sehawulisa umzwele ukuthi shuwa umuntu wahawula kangaka ingaphi iNkosi, kukanti hatshi wayekhuzwa engalaleli waze wafika komlindi uyacina. Abanye umuntu uyafa ngoba seswele lapho angathola khona usizo ngoba engamazi lalowo muntu amntshontshelayo.

Omunye isikhwama satshona sinamathele esandleni ngendaba zokutshontsha lezi, sesingabasola abantu kodwa akusicala phela ukuvikela impahla zakho ngoba zinengi izigangi la phandle. Umuntu sengacabanga ukuthi into ayitshontshayo incane ngeke umuntu ayidinge, akulanto okuthiwa ayilancedo emuntwini, okwenza abe layo yikuthi uyayidinga.

Ngakho-ke nxa uzazi ukuthi ulesandla, ulisela, zibambe, zithibe, khuza inhiziyo yakho ungenzi linto elihlazo kangaka ezwisa abanye ubuhlungu.

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds