uMthunywa
UQALILE umnyaka lezikolo zavulwa okuyinto enhle kakhulu ebantwaneni.
Lanxa kuyinto enhle lokhu abazali basele izikhwama zivuza bengela ngitsho lepeni elesikhala ngemva kokuthenga impahla zesikolo kanye lokubhadala imali yesikolo.
Lokhu kungenxa yokuthi abazali balesifiso sokuthi abantwababo bafunde babe lekusasa elihle.
Okusuka kube buhlungu-ke endabeni ezinje yikuthi lanxa abazali besebenza nzima ukuze abantwababo baphumelele ezifundweni zabo kulabanye abantwana abangakuboniyo konke lokhu, ababona kungcono ukuthi bazidlalele esikolo.
Abacabangi ukuthi abazali baswela ubuthongo ngendaba zokuthi bayabe becabanga ukuthi imali bazayithatha ngaphi kumbe ukuthi bazabhadala njani imali abayabe bezithethe ukuze bahlawule imali yesikolo.
Kuhle-ke ukuthi abantwana bengadlali ngesikolo ngoba abazali benzela bona ukuthi babelempilo engcono.
Umntwana odlala ngesikolo ecabanga ukuthi ukhawulisa omunye umuntu uyisiwula okumele abantu basizwele ngoba umuntu uyazifundela, kafundeli omunye umuntu.
Phela okuhle ngemfundo yikuthi uzifundela wena wedwa njalo nxa usufundile ngokwakho akula muntu ongakubangisa imfundo yakho.
Yebo kambe kulabanye abangacabanga ukuthi eZimbabwe yethu akusasizi ukufunda ngoba ungaze ube ufundile akula msebenzi ongawuthola kodwa into ekhona yikuthi ukufunda kuhle njalo nxa ufundile labantu bayakuhlonipha.
Lanxa kunzima ukuthi imisebenzi itholakale abantwana kabaqakathekise isikolo bafunde baze bayefika emayunivesithi bayekele ukudlala bebesebetshona bebhodabhoda.
Kuyinto enhle-ke ukuthi abantwana besikolo bahlale bekhunjuzwa ngokuqakatheka kwaso isikolo ngoba kwesinye isikhathi umuntu angacabanga ukuthi indlela abantwana abaziphatha ngayo kabazi ukuthi kuqakathekile ukuthi baqine esikolo.
Kusuka njalo kube buhlungu ukuthi abantwana besikolo basuka baphatheke kuziphithiphithi lezi ezenzakalayo elizweni lethu.
Yebo kungaba lokuphambaniseka ezifundweni ngenxa yazo lezo ziphithiphithi kodwa lokho akutsho ukuthi sokumele bavale ingwalo zabo, abantwana besikolo kumele baqhubeke bebala ingwalo zabo ukuze bangasaleli emuva ezifundweni.
Kubuhlungu njalo ukuthi kulabanye abazali okubikwa ngalezi insuku zeziphithiphithi babonakala besiyathatha abantwababo ezikolo benika izizatho ezehlukeneyo zezenzo zabo.
Kuhle ukuthi abazali bahambise abantwana esikolo babekele bafunde ngoba lokhu kulilungelo labo.
Okunye okusuka kudanise yikuthi nxa abantwana bengasenzi kuhle ezifundweni zabo abazali yibo abaqala ukusola ababalisi bathi kabafundisi abantwababo kukanti yibo imbangela yalokhu ngenxa yokuphambanisa ukufunda kwabantwana.
Kuhle-ke ukuthi abantwana bakhuthazwe ngokuqakatheka kwesikolo ngoba kabenzeli muntu kodwa bayazenzela bona bodwa ukuze babelekusasa enhle.
