uMthunywa
NJENGESIZWE sikaMthwakazi esaziyo lapho esifuna ukuya khona njalo esilenjongo ezithize kungaba kuhle sibili ukuthi wonke umuntu kulumyaka omutsha abelombono wakhe ozamupha intshukuntshu yokuthi enze yiloba yini esemthethweni ezamupha ukuphumelela.
Njengoba nje sesingene kulo umnyaka omutsha asibeni ngabantu abaziyo ngalokhu esifuna ukukwenza, asibeni ngabantu abalombono okhanyayo njalo ojulileyo.
Inengi labantu ikakhulu intsha yalamuhla alisazihluphi ngalokhu elingakwenza ukuthi ilizwe kunye lempilo zabo ziqhubekele phambili.
Kuhle sibili ukuthi sibe ngabantu abazabonakala besenza izinto ezizabathuthukisa ngempela.
Umnyaka owedlulileyo ubungumyaka olobunzima kakhulu empilweni ezitshiyeneyo njalo esingakwenza yikuthi sikhangele phambili sizitshele ukubana sizakuba ngabantu abazakhazimula kulo umnyaka esesibhekane lawo.
Indubo zika 2015 sizibonile kodwa zedlule kuhle ngoba uMama welizwe uDokotela Grace Mugabe waphumela egcekeni ngokuthi ubugwelegwele abufuneki kuleli njalo bonke abatholakala bekwenza kumele bajeziswe. Bunengi ubugwelegwele obavezwa ngumama lathi esibubonayo obusikhubayo kodwa konke lokhu sekwedlule kungakho ke kasimanyaneni sikhangele ukuthi singenzani ngalokhu kumbe sikuguqule kanjani ukuze kube yizinto ezisipha amacebo okusithuthukisa.
Uze wedlula umnyaka ophelileyo inengi lethu limkhangele nje ligoqe izandla lithi uThixo uzabona ngalokhu angakwenza ukuze siphile kodwa nje iqiniso Mthwakazi omuhle yikuthi, vele ukuze siphumelele kumele sisukume sisebenze gadalala. Bayatsho abantu ukuthi wonke umuntu kumele avuke ezenzele njalo akulanto engaphambanisa izinto zalo ozimiseleyo. Nxa kusenza umuntu lo lalo kuzamele asebenzise ikhanda lakhe kunye lezandla ukuze simaane sithuthukise umnotho welizwe ngoba phela nxa singaba limbumba singanqoba.
Abanye bangaphinda babuyele esikolo njalo kungadingakali ukuthi sebekhule okunganani, bayatsho phela abadala ukuthi ukufunda akupheli. Kuthi-ke abanye labo bangasukuma badinge amabhizimusi abangawasungula. Abanye bangaqala ukuthengisa lokhu lalokhuya ukuze bakhulise isikhwama sabo kanye leselizwe.
Abenelisayo labo bangasungula amabhizimusi amancinyane kuthi labo abavele belawo bawakhulise aqhele agcwale indawana yonke yelizwe.
Okungenziwa akupheli, ayikho into engakuvimbela indlela nxa uzimisele. Kunengi okunye njalo esingakuqamba okungenziwa uma abantu bangazitshela ukuthi sekwanele, bangazitshela njalo ukuthi ukuhlupheka lokhu okusekhaya akuphele kulumnyaka.
Kungabakuhle nxa uzulu wonke engabambana, adonse kanyekanye kungabikhona abazadonsela emuza kumbe abazaphuma emfolweni ungathi usiyaphela umnyaka sekungconywana. Phela akwaziwa okwanonisa ingulube.
Ukuqoqa amacebo ngenye into eqakathekileyo, yikho sisithi umuntu lo lalo akabe lombono wakhe abeseqoqa amacebo akhe.
Asibeni yisizwe esiphumelelayo kungadingakali ukuthi sibhekane laziphi indubo. Phela zona indubo singahlala phansi sizibheke sikhale ngazo sikhathi sonke azisoze zitshiyane lathi. Siyazi akhona amazwe afuna ukusijezisa ngezijeziso zomnotho ukuze uzulu adubeke, kodwa sithi kibo kabazinuke amakhwapha bazibuze ukuthi kambe benzani, basihawulisela khona ukuthi kasifuni kubuswa yibo abahuquluzi bomnotho. Yikho nje lomongameli wethu ehlala njalonje esithi kasibhekeni emazweni asiphathisayo ukuze umnyaka uthi uphela izinto sezilungile.
Esingakwenza nje yikulwisa sizithembise ukuthi kulumnyaka sizanqoba, ayikho into ezasivimbela.
Bakwethu umnyaka lo awube ngumnyaka wokukhanya, umnyaka wokuphumelela, umnyaka wokuphakama kunye lentokozo.
