uMthunywa
YiNtatheli kaMthunywa
KWAKUBONAKALA ukuthi ngesikhathi umuyi uWillard Khumalo engumaneja kuHighlanders abadlali babehlala bebobotheka.
Akwaziwa ukuthi yini eyayibenza bahlekelele abafana kodwa ngokukhulumisana labadlali ababekhona, uKhumalo nguye owayebabulala ngembambo.
Inengi labadlali laba alizange limbone elikhaba uWillard. Lentsha yeZimbabwe okuyiyo esigcwalisa inkundla zenguqu uWillard Khumalo imazi ngokuzwa nje.
Umbiko wokuthi uKhumalo, owayedume ngelithi nguMaWii kumbe uNduna akasekho uthinte kakhulu iqula labadlali lababukeli benguqu abambona edlala kusukela ngeminyaka yama-1980s.
UKhumalo ubhubhele esibhedlela seUnited Bulawayo Hospitals (UBH) ngemva kokuhlutshwa yinhliziyo kanye lomkhuhlane wetshukela. Imikhuhlane le yiyo eyenza ukuthi ame ukuba ngumaneja weHighlanders.
Abadlali abatshibilika okwamanje abamaziyo umuyi bachathekele uMthunywa ukuthi uMaWii ubeyindoda ethanda ukuhleka lokuhlekisa abantu.
Loba edlule kulumhlaba eleminyaka engu-49 yokuzalwa, kunengi akutshiyele imuli yomdlalo wenguqu koBulawayo.
Umama kamuyi, uJuliana Mashinkila-Khumalo utshele uMthunywa ngoLwesithathu ukuthi indodana yakhe yenza ukuthi imuli yakoKhumalo yonke ithande iqembu leHighlanders.
“Kungayisuye ngabe thina ibhola asilazi ngitsho. Nguye lo uWillard owasingenisa kuboBarbourfields sesilandela ibhola ngoba edlala. Uyise wayedlala inguqu laye kodwa lo (uWillard) okwakhe kwakuphezulu.”
UMaWii uzangcwatshwa ngoLwesine (lamuhle) eLady Stanley lapho okubekwa khona izakhamizi ezilembali eyaziwayo koBulawayo.
Uyise kaWillard, uDanny, sewatshona njalo imbali ithi wayedlalela ithimu yendulo iNorthern Rhodesia Wanderers.
Kubikwa njalo ukuthi uyisemkhulu kaMaWii wayengumongameli waleliqembu.
Uqhubeke wachaza kabanzi ukuthi uMaWii phambi kwakhe konke wayengumfana owakhula engumahlekisa.
“Angazi ukuthi ngubani ozasihlekisa.”
Kusenjalo umaqhuzu wenhlanganiso yePremier Soccer League, uKennedy Ndebele ududuze imuli yakoKhumalo, wabika ukuthi isizwe silahlekelwe yindoda ebilolwazi lokuphakamisa inguqu yabasakhulayo.
Ngokutsho kukaEnerst Maphepha Sibanda, umngane omkhulu kaMaWii, umuyi wadlalela iBosso isatshisa ilabadlali ababalisa uMadinda Ndlovu, uNetsai Moyo, uMercedes Sibanda, uSydney Zimunya, uAbraham Mbambo labanye.
“Sisakhula uWillard wayedlala lawe uze wesabe ukuthi umfana lo ulithethe ngaphi ithalenta elingaka. Lapho kwakusancintiswana njalo kwakungelula ukuthi uthole ijesi.
