uMthunywa
Nomthandazo Ndlovu
KULENDODA yeDulibadzimu edolobheni leBeitbridge etshiye izakhamizi zakule indawo zibambe owangaphansi kulandela ukuluma iloja layo isitho sangasese ilethesa icala lokuthandana lomntanayo.
Linkemenkeme yendaba okulokhu kunathiswana ngayo itiye yenzakale ngoLwesithathu kuviki ephelileyo lapho uGibson Ndou alume khona uMnumzana Tonderai Moyo isitho sangasese ngenxa yokuthi ubesethandana lendodakazi yakhe.
UNkosazana Pretty Moyo ongudadewabo kaMoyo uthe abantu basamangele ukuthi yisibindi bani esenza uNdou abambe isitho senye indoda ngamazinyo.
“Ngimangele ngilapha, loba kuthiwa yikulwa kodwa lokhu okokulumana isitho hatshi kunzima, uNdou ubesekhulelwa yikho okwenze wadumela isitho sikaTonde.
“Mina bengivakatshele umnewethu ngiphelelwe sengifikela phezulu kwento enje, into ebaxabanisileyo yikuthi umnewethu uzwana lomntanakhe, yena uphambanisile uTonde ngoba umntwana lo usesesikolo loba nje yena sekhulile ukuthi sengaba lamajaha,” kuchaza uNkszn Moyo.
Kubikwa kwaba ngumsebenzi omkhulu ukuthi behlukanise uNdou loMoyo yena owayesehlaba umkhosi uNdou senamathele wathula zwi.
“Sathwala nzima ukulamula amadoda lawa ngoba uNdou wayesemthe nka engelasifiso sokumekela, saze saqala ukutshaya yena ngoba kwakungela enye indlela esasingayenza ukubalamula,” kuchaza enye indoda eyayilapho engathandanga ukubethwa ngegama.
Ebuzwa ngodaba lolu, uMnu Ndou uthe indaba le imzondise kakhulu, ubengakhangelelanga ukuthi uMoyo enze into enjengaleyo.
“Into le ingizondisile kakhulu, uMoyo sihlalisene endlini lapha ngakho abantu nxa behlala bonke kutsho siyizihlobo ngakho bengimthatha njengomnawami, kungimangalisile ukuthola ukuthi sethandana lomntanami mina bengimthembe kangaka.
“Ngizwa ubuhlungu kakhulu ngoba umntanami usesesikolo, uMoyo yena semphambanisa ezifundweni zakhe ngapha engumuntu omdala, bekuzaba ngcono ngabe ubeyintanga yakhe, kodwa lokhu hatshi ngeke ngikuvume, ngimlumele ukuthi ngifuna ukumlungisa yonale into emenza athandane labantwana,” kuchaza uMnu Ndou.
UMnu Moyo uthe aluba ubengayithandi indodakazi kaNdou ubezambophisa ngoba into ayenzileyo kayilunganga njalo umyangisile kakhulu.
“Ngeke ngitsho okunengi ngokwenzakeleyo kodwa uNdou abonge ukuthi umntanakhe ngiyamthanda kuphela ngoba bengizambophisa ungifake abantu, ngimhloniphile,” kuphetha uMnu Moyo.
