uMthunywa
NguLungelo Ndhlovu
UKUDAKWASHE Mahachi uthe aluba wadlalela iHighlanders kudala, ngabe usekhatshana kunguqu.
Ingcitshi kanobhutshuzwayo le itshele uMthunywa ngoLwesithathu ukuthi kade yafisa ukubuyela kuTshilamoya ngesikhathi isadlala kuqembu leChicken Inn.
“Iqiniso elingaziwa ngabanengi yikuthi akulathimu engangifuna ukuyidlalela ngaphandle kweBosso. kusukela ngisasemcinyane. Ngikholwa ukuthi ngalesisikhathi ngabe sengidlala e-Europe. IHighlanders yayizangiphakamisa sibili.
“Yikho ngingazange ngithandabuze ukuqeda inyanga ezine ngikuleliqembu.”
Abalandeli beBosso bazasala befuna umphehlo lonyaka ngoba umdlali lo ubathembisa uluju kuphela isizini ingaqala.
“Ukudana kuzaphela eBarbourfields, njengoba ngilitshela ukuthi akula enye ithimu eqakatheke njengeBosso kimi.
“Ngifuna ukuvalelisa amaNdebele ukuze bengangikhohlwa,” kutsho uMahachi.
UMahachi uzadlala kuqembu leBosso okwenyanga ezine, qede lapho aye kuqembu leMamelodi Sundowns ekupheleni kwenyanga kaNhlangula.
Umdlali lo, owaziwa ngelokudlala elithi Nkembe, wakhanga abaqeqetshi bamaqembu ehlukeneyo kumqhugelwano weChan.
“Ngesikhathi ngisuka kuBosso ngisiya eGoli, ngifuna isale isezingeni eliphezulu, ngizimisele ukukwenza lokhu,” kuphetha uMahachi.
