uMthunywa
YiNtatheli kaMthunywa
UDABA olusegudwini kuliviki ngolukaBongani Mafu lomsebenzi wakhe kuqembu leHighlanders. Umqeqetshi lo usilile njalo ukuxotshwa emsebenzini kulandela ukunqotshwa kweHighlanders yiFC Platinum leWhawha kuviki edluleyo.
Umbono okhona ezitaladeni kubalandeli beTshilamoya yikuthi uMafu nguye osetshile umoya wabalandeli.
NgoMvulo langoLwesibili ibhodi lequla le-executive yeBosso bahlanganise amakhanda kudingwa ukuthi mthakathi bani osehlasele ithimu yabadala.
Ukudideka amakhanda okufikele inkokheli zeHighlanders lezi kuvela ekuthini akula obekhangelele ukuthi uMafu labadlali bakhe banqotshwe kulesi isibanga somdlalo.
Andubana adibane leFC Platinum, uMafu ukhulule inhliziyo zabalandeli bethimu ngokubhaxabula iHow Mine 5-1 eBarbourfields.
Pho kusuke kwathini? Lo yiwo umbuzo obukhona ngokudliwa kumidlalo emibili ilandelana.
UMafu wasila ukusuka kuBosso ngokuchumisa iDynamos 1-0 kunkezo yamasotsha. Kwabasobala ukuthi ibhodi layo i-executive kaPeter Dube behlisa iphika ngoba kwasokuyisikhathi eside iBosso isehlulwa yiDynamos.
Okwamanje, uMafu ungena umdlalo weviki lamatshumi amabili lanye kungela okubukekayo ngomsebenzi wakhe.
IBosso ikunombolo yesitshiyagalombili kulogu yeCastle. Imiklomelo yayo ingu-25 okungakaze kubonakale kumbali yalithimu kuminyaka emithathu edluleyo.
UMafu, ngumqeqetshi ohlonitshwayo kunguqu yakoBulawayo. Inhlonipho kumele ayengeze ngokuthabisa abalandeli. Iqembu kumele libuthe imiklomelo, okuyikhona okuzaletha ukuthula kuHighlanders.
Ubunzima obubhekane loMafu kuliviki kuyaziwa ukuthi buvele ngaphi njalo laye ubesazi ukuthi liyeza lelilanga.
Njengabo bonke abaqeqetshi abakhuza uMantengwane, uMafu uzaqathaniswa labaqeqetshi bakudala.
UKelvin Kaindu loba wasuka kuBosso ngendlela engacaciyo, wazama ukukhweza isisindo seqembu ngcono kulalokho okwenziwe nguMafu.
Kufika umdlalo wesi-21 ngesizini edluleyo iHighlanders yayindiza phezulu idliwe kumidlalo embalwa. Kumnyaka wakhe wakuqala uKaindu watshova ithimu yaze yafikisa imidlalo engamatshumi amabili lantathu inganqotshwanga.
Pho uMafu kwehlulani yena elabadlali abangcono kulalabo ababekhona ngesizini ka2012 kusiya kweka-2014?
Phakathi kwabo bonke abaqeqetshi, sekukhanya ukuthi uMafu uthandwa kakhulu. Akekho umqeqetshi osevikelwe yibhodi kanje.
Akwaziwa ukuthi kwehlulani ukuthi labo abavotelwe ukuthi balungise iqembu benze umsebenzi, ikakhulu nxa ibhodi izangenela ukuqhatshwa kwabaqeqetshi.
UMthunywa ubika ngokungesabi ukuthi umhlangano wangoMvulo uphose waxabanisa amadoda.
Uhlangothi lwe-executive olukhokhelwa nguPeter Dube kubikwa belubophe isinqumo sokuthi uMafu avalelise iqembu atshiyele umsekeli uMandla Mpofu.
Umdlalo weBosso leChicken Inn wangeSonto bekumele uphathwe nguMandla “Lulu” Mpofu ngokufuna kwe- executive.
NgoLwesithathu, ngesikhathi uMthunywa edindwa, kuzwakale ukuba ibhodi yethimu yenze umhlangano njalo wokuhlaziya udaba lukaMafu.
Inombolo zelogu ziveza mgceke ukuthi akusensuku zatshwala uMafu engavalelisanga kuHighlanders.
Umqeqetshi lo uphethwe njengeqanda kulithimu, njalo ulomlandu wokuthi azigeze kumdlalo olandelayo leChicken Inn eMagumeni.
Ibhodi le-executive bengacatshi ngomunwe ngoba ithimu ingatshabalala.
