UMAFU UCHITHA IGWAYI: ‘Ngeke sidliwe yiDeMbare’

26 Jun, 2015 - 10:06 0 Views
UMAFU UCHITHA IGWAYI: ‘Ngeke sidliwe yiDeMbare’ Bongani Mafu

uMthunywa

YiNtatheli kaMthunywa
UMQEQETSHI weHighlanders uBongani Mafu uthe ithimu yakhe yayihlala inqotshwa yiDynamos ngoba yena wayengekho.

Sekuleminyaka iHighlanders FC idliwa yiDynamos kuyo yonke imincintiswano. UMafu uthe lonyaka umbuso weDeMbare uyaphela.

Amathimu la adibana ngeSonto kumdlalo wetshumi lane kuligi yeCastle esigodlweni.

Ekhuluma loMthunywa phakathi kweviki, uMafu ufunge wagomela ukuthi abafana bakhe ngeke badliwe yiDembare futhi .

UMafu uyibophe yaqina ithimu yakhe njalo ukholwa ukuthi bazanqoba. NgoLwesibili uMafu uqhubeke ngokulolonga abafana ukuze balungele umdlalo wabo. Ithimu itshone igijima esabhabha yeHillside lapho okulohlelo lwe-bootcamp olokuqinisa umzimba.

Kuliviki uMthunywa uvakatshele ithimu yezwe lonke ngesikhathi ilolongela umdlalo wayo leDynamos. Iloba uMafu ubekhala ngokuthi abanye abadlali abaqinanga, ulesiqiniseko sokuthi iDynamos izatshaywa.

Umqeqetshi lo kayiqhuqhi ngitsho iDeMbare njalo ukunqotshwa yiyo kumasizini adluleyo kakubali.

“Lonyaka sizayibhuqa iDynamos. Kubuhlungu ukuthi sibelembali yokwehluleka ukunqoba ithimu eyodwa kuminyaka edluleyo kodwa lonyaka ngokulolonga esikwenzayo, angiboni ukuthi singanqotshwa.

“Siphakathi kwamalungiselelo omdlalo lo loba kulabafana bami ababili abalimeleyo u-Ariel Sibanda kanye loRahman Kutsanzira. Ngilethemba lokuthi abafana laba bazabe sebengcono kumpelaviki ngesikhathi somdlalo,” kutsho uMafu.

IDynamos ingena enkundleni imisila iphansi. Ithimu le ayikaze inqotshwe ngalindlela kulesi isigaba seligi kumasizini adluleyo.

Lokho kungabe kuyikho okuletha ukuzethemba kubadlali beBosso ngoba iDynamos ayikaze ifike kulesisigaba ilapho ekhona engalaneni.

Omunye umlandeli weqembu leBosso uNdumiso Ncube ubikele uMthunywa ukuthi uMafu kuzamele enze okungcono kumdlalo lo.

“Kuyasikhathaza ukuthi sokuleminyaka eminengi silokhe sisehlulwa liqembu elilodwa. I-Caps United layo yayihlala isehlulwa liqembu leli kodwa yasukumela phezulu yenza okungcono kungakho leBosso kuzamele isebenze nzima ukuze iphume kusithuko sokudliwa,” kutsho umlandeli lo.

Umabonakude weSupersport uzakhupha lumdlalo.

Imidlalo yeCastle PSL ekhona kulimpelaviki:
NgoMgqibelo: FC Platinum v Buffaloes (Mandava), Chicken Inn v Dongo (Luveve), Tsholotsho v Flame Lilly (White City), Harare City v Caps United (Rufaro).

NgeSonto: Dynamos v Highlanders (Rufaro), Whawha v Chapungu (Ascot), How Mine v Hwange (Luveve),
Triangle v ZPC Kariba (Gibbo).

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds