UMadinda mothu iChibuku

UMadinda mothu iChibuku

0 345
Madinda Ndlovu

YiNtatheli kaMthunywa
INKEZO yeChibuku Super kumdlalo kanobhutshuzwayo ibanjwa yileyo elabadlali abomileyo.

Lomqeqetshi weHighlanders uMadinda Ndlovu ungomunye walabo abayiwomeleyo inkezo le.

Kulimpelaviki amaqembu ayisitshiya galombili angena enkundleni omile, inhloso kuyikulwela ukunqoba kuhlandla lama-quarter-final enkezo le.

Umqhudelwano lo udibanisa iHarare City, Highlanders, Chapungu, Caps United, Dynamos, Herentals, Triangle leNichrut.

Phakathi kwaliviki inhlanganiso yePSL ibambene labaqoqi benkezo iphume lohlelo lokudlala kwamaqembu la.

Ekuhleleni kwamaqembu, inkunzi zakoBulawayo iHighlanders idibaniswe leHarare City yeRufaro ngoMgqibelo. Amaqembu la awaqali ukuhlangana kusigaba senkezo njalo akwaziwa ukuthi yiphi engephula enye.

IHarare City iyesatshwa kulinkezo ngoba isike yayithwala, amaqembu anjengeHighlanders esehluleka.

Kungumbono kaMadinda ukuthi njengoba iHighlanders ingasoke inqobe iligi yeCastle, kungangcono ithwale inkezo yeChibuku.

Kweminye imidlalo, abafana beNkabazwe iChapungu bazadlala leCaps United eAscot. Iqembu leDynamos eselikhangelane lokukhitshwa kuligi yePSL ngenxa yokudliwa, lizathi ukubopha ziqine ngesikhathi lidibana leHerentals kulinkezo.

ITriangle United ngelinye lamaqembu asedlale kuhle kunkezo yeChibuku kumasizini adluleyo. Ithimu le inxusa abafana abatsha iNichrut enkundleni yeGibbo.

Iqembu elizakuba yintshantshu yeChibuku Super Cup lizamela isizwe kumqhudelwano yeCaf Confederations Cup ngomnyaka ozayo.

Nansi imidlalo yeChibuku Super Cup:
NgoMgqibelo: Harare City v Highlanders (Rufaro), Chapungu v Caps United (Ascot)
NgeSonto: Dynamos v Herentals (Rufaro), Triangle v Nichrut (Gibbo)

SIMILAR ARTICLES

0 73

NO COMMENTS

Leave a Reply