uMthunywa
Nomthandazo Ndlovu
SESIDLA ubhedu amagundwane esigabeni seNdimimbili eLupane nanko phela seluma aze abulale abantu.
Kubikwa kulenina lakule indawo elilunywe ligundwane lafa kuviki ephelileyo. Linsindabaphenduli yendaba etshiye izakhamizi zikhuza imihlola njalo zitshe amathe yenzakale ngeviki ephelileyo lapho inina okuzwakale ukuthi nguMaSibanda nje kuphela elilunywe khona ligundwane lithanyela endlini lafa.
Ekhuluma loMthunywa uNkosikazi Sibonile Nkomo oyisakhamuzi sakule indawo uthe abalankani njalo lokhu besamangele ngesiga esehlele umakhelwane wabo.
“Mina angilankani ngilapha, thina sizwa kuthiwa uMaSibanda ubebulala amagundwane wona abesehluphile endlini yabantwana yokulala yikho ukuvuka ekuseni bephuma ijumo lokuyawabulala. Kubikwa bawatshaya bawabulala aze aba mathathu, kuthe elesine lamwela emahlombe lamluma wahle waphuma endlini engani sephambene ingqondo,” kutsho uNkkz Nkomo.
Kubikwa ngemva kokulunywa ligundwane leli uMaSibanda waphuma endlini egijima wabhoda ngomkulu kathathu wahle waqala ukugula ngemva kwamalanga amathathu wafa. UMnumzana Lawrence Bhebhe laye oyisakhamuzi sakule indawo uthe ubuthakathi osobusiba khona endaweni yakibo sobusethusa.
“Angazi ukuthi abantu bakithi sebengenwe yini, indlela abantu abafa ngayo lapha iyasolisa sibili, akula muntu ongalunywa ligundwane afe, ngiyaqala ukukuzwa lokhu mina njalo kungethusile,” kuchaza uMnu Bhebhe.
“Besikhonale esililweni sakhe yikho lapho engikholwe khona ukuthi izinto ziyenzakala lapha empilweni, kulomuntu ogangileyo lapha omsebenzileyo ngiyala mina ukuthi ligundwane nje leli,” kutsho uMnu Bhebhe.
Ibuzwa ngodaba lolu induna uMabhikwa ithe ibingakezwa ngodaba lolu.
“Okwakhathesi angikho eLupane bengingakezwa ngodaba lolu kodwa ngizadingisisa ngalo,” kuphetha induna uMabhikwa.
