uMthunywa
NGEZIMNANDI zodwa ezilethwa liphephandaba likazulu kusa kwamalanga nanko phela lakule iviki sililethela abalandeli umhlabeleli ohlukileyo olekhono lokuhlabela ingoma ze-hip-hop, igqom kanye leAfro-pop uMziStozz Mfanafuthi owaziwa kakhulu koNtuthu ngemva kokukhipha ingoma yakhe ethi Khonaph’ umuntu. Ibizo lakhe lokuzalwa engu-Mzingaye Ray Ncube.
UMzistozz uxoxe lentatheli kaMthunywa waveza kabanzi ngomculo wakhe kanye lembali yakhe. Nxa ufuna ukuba kwazi kabanzi ngalumhlabeleli nansi ingxoxo phakathi kukaMzingaye Ncube (MN) lentatheli kaMthunywa uArnold Ndlovu (AN).
AN: MfokaNcube akwabele abalandeli kabanzi ngawe lendima yakho kwezomculo?
MN: Mina ngokuzalwa ngaphiwa ibizo elithi Mzingaye Ray Ncube, ngingumntwana wesibili emulini yabane, owokuqala engumfana ngakho mina ngiyindodana yesibili ngazipha ibizo kwezomculo elithi “Mfanafuthi”.
Ngakhulela eNtumbane kodwa khathesi sengihlala eCowdray Park.
Umculo engijule kuwo kakhulu yi-rap njalo ngithanda ukusebenzisa ulimi lwethu lwesiNtu kakhulu ngoba abantu engiphila labo bazwisisa lona ngcono. Ukuthanda kwami umculo kwaqala ngisafunda uGrade 3 lapho engathengelwa khona isiginci sami sakuqala kwathi ngokukhula sengikuForm 1 ngangena ku-rap ngisafunda eMpopoma High School. Abantu abangigqugquzela ukuthi ngingene ngigxile emculweni ngabahlabeleli abafana loMzoe 7 loJah Sent.
AN: Njengomuntu owaqala kudala ezomculo akutsho ukuthi usebenzisana labobani?
MN: Emculweni vele akukho lula njalo kumele ube labantu oncedisana labo, mina ngisebenzisana labahlabeleli abanengi abatshiyeneyo koNtuthu kodwa engisebenzisana labo kakhulu yiTaddy Bear Events, Rukuta crew kanye lePhatSounds Crew.
AN: Abantu bawamukela njani umculo wakho, bayawuthakazelela yini?
MN: Bayawuthakazelela umculo wami ngitsho labadala, ikakhulu nxa ngikhangela abadala ngisebenzisa indlela ezabahlanganisa lentsha ngoba ngikhuluma ngezinto ezihlupha loba ngubani emhlabeni esikuwo. Intsha yona iyawuthakazelela kakhulu umculo wami.
AN: Ngiyakuzwa Ncube, akutsho ujwayele ukuthokozisa abantu ungaphi ngomculo wakho lo?
MN: Mina njengomhlabeleli ngijayele ukuhlabela kakhulu endaweni ezitshiyeneyo, ngiyanxuswa emicimbini yamankampani atshiyeneyo kanye lasemicimbini yemisakazo ekhona koNtuthu.
AN: Bunzima bani elihlangana labo kwezomculo?
MN: Ubunzima bukhona sibili emculweni ngoba imali esiyibhadalwayo ayeneli njalo ngingumfundi, isikhathi sibalulekile kimi ukuthi ngenze inhlelo zesikolo ngiphinde ngenze umculo.
AN: Nkuthazo bani ongayipha intsha efuna ukungena endimeni le?
MN: Engingakutsho yikuthi nxa ufuna ukuba ngumhlabeleli landela inhliziyo yakho, uphinde usebenze gadalala ngoba endimeni le kufuna abantu abazimiseleyo.
