uMthunywa
Silo Ophezulu Stinta
Lwalotshwa nguAT Kheswa loMSS Gcumisa
Ngeviki ephelileyo kundatshana elesihloko esithi Sakholiseka yileli Tende, sitshiye amadoda amabili uMshashadu loMagabha besinde emlonyeni wesilo, bencedwe nje yikuyazilahla khona phakathi kwalelo Tende ababengafuni kuzwa ngalo belinetha ngazo zonke inhlamba bethi lalizophambanisa ukuphila kwabo. Otsotsi laba kucaca nje inhlonipho ayisonto abayidalelwayo, yilabo okuthiwa bedlula zisengwa. Nampo befika bejama ngasemnyango wetende lesonto besongela laba abasebephunyuke emjibileni ukuthi babonge letende ngoba babezaphatha amathumbu ngezandla.
Bazilahla khona kanye emsamo enyaweni zikaMvangeli. Umvangeli uMabuza wahle wabemukela ngesihle njengabantu abasebekhethe iNkosi njengomsindisi, wabanxusa-ke ukuthi bezothandaza ndawonye.
Kulababili inkungu yayilokhu ibambile izifuba zisalokhe zibhamuza ngovalo lokusinda kuleya migulukudu.
Bakhulekelwa kuthe nje lapho kuthi dlwe kuMshashadu wathi nje jeqe kumngane wakhe waphosa elithi: “kusisindisile ukungena lapha etendeni, besesifile!” (pg 48).
Abantu abanengi ababengazi nje ukuthi kwakuqhubeka mbiza bani phakathi kwalaba ababili bamangala ngenkulumo enje basebebonga nje ukuthi okusalayo laba bantu basebethole insindiso.
Kwabayisifundo abangazange basibaliselwe muntu laba ababili kodwa sabalanda ngqo mathupha ukuthi itende leli ababelisola belitsho ngezithuko yilo futhi elaba lamandla okuthi lisindise impilo zabo ekufeni ngoba babengelayo leyo mali eyayifunwa yizigebengu, khona layo encinyane yakhona kwazi bani ukuthi yayizanelisa inhliziyo yalezi zigebengu.
Kusobala nje ukuthi yibo futhi ababezazisa abantu abafana loMazwane ukuthi itende leli liphethe ukuphila, bangabe besalibuka ngaleliyana ilihlo lokweyisa.
Isililo sesihloko sesiguquka manje sibheka kulimgulukudu yabakhuthuzi ukuthi yibo abasebesuke baphoxwa yileli tende ngoba nje nanto labakhupaha inyama emlonyeni sebezitholele umjimbo walelolanga.
Babengasoze futhi bakhahlameze abantu ababesiza kulelotende.
Kulendatshana umlobi ubesivezela ukuthi abantu balakho ukuqakathekisa ezinye izinto empilweni bazenze zibe yinsika yempilo yabo kodwa kujinge kubesobala ukuthi impilo kayidingi ezinye izinto kodwa idinga ukusekelwa ngokuthile.
