uMthunywa
Ophezulu Stinta – Siqhubeka ngendatshana elesihloko esithi, Isipho lapho umabhala incwadi engazange athande ukuzichaza kodwa elokhu ethembisa ngesipho esiyisimanga. UThabo wayejabule okwamagama waze nje wayidlulisela kumngane wakhe uSenzo laye wabuye wamqonqosela ukuthi angaze alibala ukumhlephunela leso sipho mhla wasithola laye.
Kwathi njalo ngoLwesithathu uThabo lo Thandi bemukela njalo enye incwadi eyayigcizelela ngalesi sipho. Lo owayibhalayo waze watsho ngawoluju ukuthi leso sipho usasigodlile kathandi nje lakancane simotshakale yikho sebone kungcono ukuthi asilethe yena mathupha angalokothi ngokusiphathisa omunye umuntu. Wabuye njalo wabazisa ukuthi baze balinde ngosuku Lwesihlanu kule eyesibili wayebhalile ke isibongo sakhe.
UThabo lo Thandi babuzana ngalesi sibongo kodwa kwacaca ukuthi phakathi kwabo kakho owayesakhumbula isibongo lesi. Basilindela ngamehlo abomvu langenhliziyo ezimhlophe nke isipho lesi uThandi uze nje agcizelele ukuthi ngalolu suku emsebenzini utshayisa masinyane lokho ke kwakuzamnceda ukuthi aye didizelela isethekeli sabo ukuze sifikele ekhaya elifudumalayo.
Kuyindlela eyethusayo kanti futhi engajayelekanga ukuthi umuntu ajabule akhululeke ngesipho esingela gama njalo silethwa ngumuntu ongaziveziyo. Wayenjalo ke uThabo ejabule efile waze wazisa labomakhelwane. Lafika elingaliyo njengenjayelo uThabo wafika ngakwakhe sekuhlwile evele ephuza ukutshayisa ngoLwesihlanu.
Engena nje endlini egumeni lomuzi wakhe watshayisana lomkakhe eyaluzela egumeni kucaca nje ukuthi kukhona okwakungamphathanga kuhle. Walandisela umyeni wakhe ngesiga sentombazana esafika sabuza ukuthi ngabe bazithola na incwadi ababhalela zona. Leyo ntombazana yaveza igama layo ayizange izifihle. Kwathi nje ngemva kwengxoxo thize intombazana leyo yacela indlu encane yavele nje yatshaya utshani.
Ekunyamalaleni kwayo yatshiya ingane eyayicaca nje ithithibele layo ingazi ukuthi kwenzakalani. Ngokuphazima kwelihlo nje wamkhumbula uNeliswa Phoswa owayebaleke ngakibo esezithwele ebalekela uyise owayesidla amalahle. Yiyo le ingane eyayiyisipho sikaThabo, wasithanda kakhulu isipho esiyingane yakhe ayengazi ukuthi uzakufa wayibona na.
