uMthunywa
Ophezulu Stinta
KULE iviki sikhangela indatshana elesihloko esithi “Ngifuna Unina Wabantwabami.’’
Nxa sinanzelela isihloko lesi kusegcekeni njalo kuyikuzwisisa ukuthi yindoda ekhalayo lapha emva kokutshiywa mhlawumbe ukubalekelwa yinkosikazi ngenxa yezizatho ezitshiyeneyo.
Ekuqaleni kwendatshana lapha sihlangana lo S’mangaokukhanya esola kakhulu umngane wakhe uS’cebi ababengamathe lolimi. Umbiza ngokungathembeki kanye lokuswela isimilo aze ababaze ethi yena “impela basuke beqinisile lapho bethi ungamethembi umuntu”
Ababili laba babezimuli ezazithandana okwamagama njalo zisizana kukho konke okwakudinga ukusizana. Kwathi lalapho uS’manga ehlelwe yingozi yemota okwamenza wazithola eselaliswe esibhedlela uS’cebi lo Jabulile abazange bakhathale yikumvakatshela esibhedlela kwala lalapho esephumile esibhedlela abazange badinwe baqhubeka nje bembonisa uthando lwabangane abaqotho. Amakhosikazi alaba bobabili lawo ayethandana okwezelamani okokuthi lamhla inyanga iphelile babehamba bonke edolobheni besiyathenga impahla ezazidingeka.
Kwathi nje ngenye imini eyisithutha uS’cebi watshayisana lombiko owawumazisa ngemfa yomkadadewabo.
Wakubona nje kufanele ukuthi aye ngekhaya kusemasinyane ayekwazisa owangakwakhe ukuze asale elungiselela ukuthi bayekhulumisa uNami udadewabo kaS’cebi. US’cebi wafika emzini wakhe ngezikhathi zetiye ekuseni lapho athola umhlolo angakaze adibane lawo engena nje endlini wafica umkakhe loS’manga begonene esofeni kumnandi kunjeya.
US’cebi kazange awuvule owakhe wazizwa nje laye sengathi uthungiwe. Into nje enelisa ukuyenza yikungena ekamelweni lokulala lapho afika atshiya khona incwadi le eyayithwele umbiko wokufa. Wayengathi kukhona okumxotshayo endlini lapha waphuma engazange ngitsho avule umlomo wangena emoteni yakhe wachitha eseqonde emsebenzini. US’manga wavele wakhamisa umlomo kwabanzima khona ukukhupha amazwi lalapho wayefisa ukukhuluma. Wazama ukuthi amlandele kodwa lutho nje ukuthi amfice. Ntambama esetshayisile uS’cebi wabuya endlini lapho afika nje walungiselela uhambo lwabo ethule zwi. Bahamba engazange ayithi vu eyasemini.
