uMthunywa
B D Ndlovu
SIYAQHUBEKA ngohambo lwabalweli benkululeko esibabona bezimisela ngokuyalwela ilizwe leZimbabwe.
Zibuhlungu indlela abadlula phakathi kwazo, belala egangeni bethuzana lezilo zeganga ezazilakho ukuthi zibafohloze.Bathubela phakathi komnyama odli mpisi bekhanyisa ngamehlo aphandliweyo.Ubuthongo yinto abayifisa ngelihlo lenhliziyo lapho kulethutshana baqutha obomvundla. Babelala beqamele imibhobho okusobala ukuthi kwakuyibuthongo obungela kuthula obunganambithekiyo ngitsho lakancane.
Singena isahluko sesibili. Amajaha empi yenkululeko ayeke azama nje ukuthi yoko loba kwakungobo mvundla. Imizimba yayifutha kambe ingasayazi indawo efudumalayo kanye lendawo ebutofotofo njengombheda. Bathi nje besizwa iqhude lakuqala likhala bahle bavuka nje bathi khwatshu, indaba yephango yona-ke yayingakhulumeki. Indlela ababengasila ngayo yayingeyokuthi bayephanda ezakhamizini.
Lazo izakhamizi lezi zasezisazi kamhlophe nje ukuthi babesethekelelwa yizethekeli ezifana lalezi loba yisiphi isikhathi. UMthakathomnyama onguye owayehola iqembu likaMzilakawulandelwa, wakhetha ababili laye uMzila engomunye wabakhethiweyo ukuthi bangene phakathi kwezakhamizi ukuze bayethola ukudla, okunye njalo kwakudingeka ukuthi bacwayisise ngenyawo zezitha nxa zazithe zabonakala kuleso sigaba.
Ukucwayisisa lokhu kwakuyiyo indlela yokwazi ngesitha ukuthi singaphi.
Baphuma-ke baqonda emizini, endleleni lapha babengathembi muntu siyananzelela besethuka lapho besizwa amazwi abantu ababekhuluma besiza ngendlela bahle basithele ngezihlahla behlahle amehlo lapho okwakuvelela khona amazwi. Babona nje ukuthi kwakungabantu besifazana ababezivelela emfuleni bethwele imigqomo yamanzi.
Abafana beganga bananzelela ukuthi kwakungabantu abamsulwa baziveza, baphuma ezixukwini. Omama benkosi bethuka baze bawisela phansi imigqomo yabo yamanzi. Basondela kibo ngelokuzama ukubathoba ukuthi bangaze bethuka kakhulu. Ngelipholileyo bababuzisisa ukuthi amabhunu ayezwakalela ngaphi komango. Babazisa ngelithi kulezo nsuku ayethule kodwa ayeke abonakala loba nje kwasekulesikhathi badlula.
Abafana beganga labo-ke basebelenhlansana ngelithi babengaphi omabonabulawe.Kwasekumele baqhubekele phambili ngohambo lwabo bengena phakathi kwemizi kodwa babengalilibali elokuhamba beqaphile, ingozi ayaziwa.Izakhamizi lazo zazihlala ziphakathi kovalo, zazingakwazi ukuthula ngitsho lakancane nxa kwakuthe kwabonakala laba bantu ngoba nje kwakusaziwa ukuthi lamabhunu ayengalala ezula zula kuleyondawo kuqhume izibhamu kube nzima.
