Ukuhluzwa kogwalo Umzila kawulandelwa

01 Nov, 2018 - 00:11 0 Views
Ukuhluzwa kogwalo Umzila kawulandelwa

uMthunywa

NGEVIKI edluleyo sitshiye uMzilakawulandelwa ezama ukubuzisisa kuMaZondo ngabanye bakhe ngesifiso sokuthi nxa babengafika wayefisa ukuxoxisana labo ngesimo sakhe lomzamo wokuyafika kweleBotswana ukuze athole uncedo. UMaZondo-ke yena wayengakuzwisisi lokho ukuthi kwakungenzeka ngayiphi indlela ngoba wayebona ubunzima bodwa njengoba nje lesitha laso sasibhahile.

KuMzilakawulandelwa kwakulula okwamagama lokho njengoba babevele beqeqetshiwe ngokuhamba ngendlela ezicatshileyo.

Ngemva kokudla uphiwa umuthi wokunatha kanye lowokufaka esilondeni lapha.

UMaZondo simbona ebhodabhoda phandle kwesiphala lapha echela ebiza izinyoka zakibo aze anxuse ngitsho lalezo angazaziyo ezakoMzilakawulandelwa, wayecela ukuba iqhawe leli liphathiswe lilulame njengoba nje kwakungumntwana owayelwela inkululeko yesizwe.

Lapha-ke sinanzelela indikimba yenkolo esihlangana layo lapha ukuthi kwakukhona ukuthembela kwabaphansi ngokukholwa ukuthi babezaba yibo njalo abazavikela bahole futhi abantwana besizwe.

Yayiyinkolo eyayilamandla okwamagama ngesikhathi lesi yikho nje sinanzelela lokuthi izigulane zazihanjiswa enyangeni ukuze zithole ukwelatshwa kungakaze kukhulunywe ngendaba yesibhedlela.

Kwathi-ke ngosuku olufanayo phakathi kobusuku uMzila ephakathi kobuthongo wezwa izisinde phandle lapha kanye lokuxokozela thile.

Wayethi mhlawumbe liphupho kodwa waze waphaphama wazithola nje ukuthi wayengaphuphi kodwa-ke zazikhona izisinde phandle kwesiphala ayelele kuso.

Wathi lapho elunguza ngesikhala sesiphala wethuka okwamagama ebona ijombo lesotsha lilunguze esiphaleni. Kwakusobala-ke ukuthi isotsha leli lalidingadinga phezu kwesiphala lapha.

Masinyane nje wezwa selijithikela phansi, esebambe amaphaphu ngezandla wezwa kukhwaza ilizwi elalisithi umuntu wonke kaphumele egcekeni lomuzi izandla zonke zisemoyeni. Kwasekuzalele ingwe kulumuzi.

Laye wazizwa ephela amandla evaleka lomphefumulo. Kwasekuzwakala isililo sezingane kanye lezinja zalapha ekhaya ezase zikhuza umhlolo lo ongaka ezaziwubona.

Abebutho laba baxoxisana lomnini muzi okwesikhathi eside okwamagama loba nje wayengezwa ukuthi kwakukhulunywa ngani, kuthiwani njalo.

Wabuya njalo wezwa sebefohla uthango wazibuza wasweli mpendulo ukuthi kambe ngabe basebekutholile na ababekudinga.

Akukho ayesekulindile ngaphandle kwezandla zezitha ukuthi nje zimxhakalaze zimkhuphe phandle ziyezenzela umathanda ngaye.

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds