uMthunywa
Olwalotshwa ngu B D Ndlovu
IHLOMA isiyaphambili eyomdaka omnyama. Abafo basebehlukaniswe ngamaqembu atshiyeneyo kanye langamakhono abo ezempi.
Bayingena indlela baqansa amagusu kanye lamaqaqa eJibajiba, lapho-ke osilandisela indaba, uMzila uyatsho-ke ukuthi indunankulu yabo ngaleso sikhathi yababuthanisa yathi nje ukuba ncweba udlebe kakhulukazi, kwakungasimsebenzi omncane lo ababewuphumela ijumo. Kwakubalulekile-ke ukuthi balinde beqaphe ngelokhozi lowo mzuzu ababexwayiswe ngawo ukuthi kulapho-ke abafokazana ababevuka ezikhundleni zokuchathama sebelubangise enkambeni ukuya kuzwa ngeziloyiso zosuku.
Waqonqonsela kakhulukazi usibalukhulu wabo ukuthi kwakumele basebenzise lelothuba kungela kuthandabuza kwakumele batshaye bagadle, batshaye bachithe kube lusuku lokuqothula imbokodo lesisekelo. Wabanika nje imizuzu engamatshumi amathathu ukuthi kube sekulucaca, sebetshaye kwabalucaca. Nxa kwakusitsho ukuthi bazakufa babezakufa.
Bazigodla bazimisa izikhali, uDligazi wayezwakala ebunyameni ukuthi wayefuthelene ephefumulela phezulu.
Bamisa inkomba zabo ngokufanayo ukuze bangaphambanisi uhlelo. UMzila wayimisa inkonkoni yakhe yajama wayidinga indawo lapho ayezabona kuhle khona wachathama phezu kombundu. Wazizwa inkukhu ziphendulana imizi ngemizi kwabasobala ukuthi zazibika ukusa, lapho-ke lwamtshaya lwameqa uvalo ezibuza engelampendulo ngesinqumo esingaka ayesesithethe. Babezaphumelela pho?
Waziduduza ngaweqhawe wazibamba amaphaphu la ayesebhulana lesifuba. Wathi nje esesephakathi kwemicabango wabona inhlasana ekude isithi cwayicwayi wahle wazi ukuthi kwakuyisitha leso esasibhema igwayi. Lapho-ke wayeseyikhombele inkonkoni ingasacwayizi laye amehlo akhe ayesethe nhlo kunkombalanga yakhe eselinde nje umzuzu obekiweyo. Wazizwa ehlatshwa yintshongolo endlebeni, konke lokhu wakutshaya indiva. Kwakungasamelanga akhangele ezinye inkathazo loba nje zazitshaya enyameni.
Wayilalisa inkonkoni ngesifuba esesaba ukuthi hlezi abafo babezananzelela uphondo olulamakhala luthutsha phezulu. Itshapha lalingafuneki ngaleso isikhathi, kwakumele kunanzelelwe loba yini eyayingakhanga amehlo esitha. Wananzelela ukuthi uphondo lwenkomba langa lwalungemanga lwalu lokhu lukhenceza luhamba, satotoba saze sathi ngqe kumizuzu elitshumi lanhlanu lingakatshayi ihola lesithupha.
Waphefumula otshisa vutha wananzelela ukuthi wawusufikile umzuzu ongaliyo. Elokhu ewavule engacwayizi kuleyondawo ayebona ucwayi cwayi wesitha, wabona isiqwabalanda sendoda simile sigaxe saphelela emhlane, sasigodle inkafulakufa siphephembela indawo yonke laso silinde ukugadla sichithe.
UMzilakawulandelwa-ke yena wayethiye ngenkomba yesokudla wathula zwi.
