uMthunywa
B D Ndlovu
SIQHUBEKA NGENDABA YETHU yezombangazwe. Lapha esatshiya khona abafana beganga sebephakathi komuzi besiyadinga ukudla. Lapho esasesinanzelele khona olunye uhlangothi lochuku lombuso wabelungu bethathela abantu inkomo zabo ngaphandle kwemvumo yabo.
Singena isahluko sesithathu. Kwathi ngelanga elilandelayo baqhubeka ngohambo lwabo betsholobela phakathi kwamagusu amnyama bephumphutha phakathi komnyama. Babezingelwa langendizamtshina, lapho besizwa umdumo wendizamtshina kwakusiba nzima ngoba abantu babesazi ukuthi umdumo wawusitsho ukufa.
Lapho beqhubeka ngohambo lwabo bedlula emasimini benanzelela ukuthi ukhula lwaselubhahile kucaca sobala ukuthi abantu babengasalugxobi emasimini abo. Lokhu-ke lakho kulemithelela emibi njalo ebuhlungu kakhulu kuzimuli ngoba lokhu kuchaza ukuthi indlala yayilandela njengoba nje ukudla kwakufela ekhuleni.
Yikho nje abadala besithi impi ihamba lendlala, abantu bayabe besesaba lokuphuma besiya emasimini ngoba abahlangana lakho kuyesabeka basuke babone nje ukuthi kungcono bazihlalele emizini yabo.
Besaqhubeka lohambo lolu babona nje ngamanqe ezulazula emoyeni ukuthi kwakulesidumbu somunye wabo, inyoni zasendle zasezizithaphuzela zinganake lutho. OMzilakawulandelwa bathola ukuthi isidumbu lesi kwakuyisidumbu somunye wabo. Kwasekufanele balondoloze isidumbu somunye wabo. Ubuhlungu esibubonayo yikuthi isikhathi sokulondoloza isidumbu sasingekho, umuntu wayesifa alahlwe njengenyamazana, adonselwe emlindini asale esiba yikudla kwamanqe.
Yiyo indlela omunye wabo abamlondoloza ngayo oMzilakawulandelwa kanye loMthakathi omnyama. Bakwenza lokho ngokuphangisa okukhulu kakhulu badlulela phambili ngohambo lwabo. Endleleni lapha bananzelela ukuthi kwakuthule cwaka njengasemasimini abawadlulayo, babebona nje ngezifuyo ziphongu gcwala indawo yonke kucaca nje ukuthi akulamuntu owayezinanzelela okwakuveza nje ukuthi kukhona okwakungahambi kuhle ekuhlaleni lapha lazo izakhamizi zithule zithe cwaka kungabonakali loyakukha amanzi. Konke lokhu kuveza umumo ongejayelekiyo njalo obika ubunzima kanye lokuhlupheka okubuhlungu phakathi kwezakhamizi.
Umumo ofana lalo yiwo owawubabikela ukuthi baqaphe ngazo zonke izikhathi ngoba kwakusobala ukuthi isitha sasiseduze, kwakungenzeka nje ukuthi laso sasilindile sicandeme simelele nje ukuhlasela. Kwakungekho ukuthula empilweni zabantu, abantu babehlala nje bebambe izifuba belinde loba yini.
