Silo Charles Dube

Umvuzo Wezinyembezi

Lulotshwe nguBernard D Ndlovu

Kunsukwana ezisanda kwedlula sitshiye udaba lwethu lolu lapho itshabhini kaMaDube isifike emaphethelweni. Siyakhumbula bafundi ukuthi itshabhini le yiyo ebesilethe ukungahlaliseki kwabantu bePhumula. Kuvela sobala ukuthi abantu bePhumula bebengathandi lokho obekusenzakala kuleyondlu.

UMaDube, umnikazi wetshabhi ubegcine amantombazana amanengi abeyibo abesenza itshabhini yakhe iqhube kuhle ngokuhuga abesilisa ukuthi bazonatha khona lapho. Amantombazana la abephila ngokuthengisa imizimba yabo, imali ibhadalwa kumnini tshabhini uMaDube, abeseholisa lawo mantombazana imali ngemva kokuba esethethe eyakhe.

Itshabhini le ivalwa ngoba sekusuke uthuli lwezichwe, impi phakathi kwamakhasimende kaMaDube. UZwanelukafudu ulwisa uMoyo ngoba ethi umthethisile ngokumbiza ngelika sibungwana.

Laba ababili balwa impi enzima okokuthi bebengabulalana ngoba uMoyo uyazihudela kuthi ngakwelinye icele uZwanelukafudu laye alahlekelwe  ngamazinyo amabili.

Ngenxa yomsindo lowo kufika amapholisa azobopha labo abalwayo.
Indaba yonakala khonapho ekufikeni kwamapholisa. Ukubola komthetho kuyavela sobala khonapho. Amapholisa azobopha abantu nguNyirongo loXaba ababevele labo belecala lokwephula umthetho ngoba uMaDube wayebabhadala isivalamlomo ukuthi bengavali itshabhini yakhe.

Babephiwa utshwala kanye lokudla okunjengenyama yenkukhu. Esenzenje amapholisa la ayengakwazi ukuthi abantu bakhangele.

Enza iphutha njalo amapholisa la ngoba bafike babophe abantu abalwayo kuphela batshiye amantombazana okuyiwo abangele lokho kulwa. UMaDube laye bayamthatha bezama ukuvala abantu amehlo bona bezathi bephambili bengakayifika lenkambeni bamkhulule.

Lokhu kwaliwa ngabantu bekhokhelwe ngumkhokheli wesiqinti sePhumula uMavala Mlotshwa.
Nxa amapholisa ephuma lalabo ababesilwa uMlotshwa ubahlangabeza ngombuzo othi bazamani? Uyabatshela ukuthi kumbe abazi ukuthi bayazi ukuthi uMaDube kade wabanika isivalamlomo.

Uyawatshela amapholisa ukuthi nxa engabophanga wonke amapendeka agcwele endlini kaMaDube kabedluli lapho okume khona abantu. Wathi bangeke batshaye inyoka umsila bayekele ikhanda layo.

Wayaphambili uMlotshwa ngelenzondo ethi lokho abakwenzayo kufana lokuxubha isilwane amazinyo. Umpholisa uXaba uzama ukuzizondisa esethusela uMlotshwa ukuthi engaze wafaka umthetho ezandleni zakhe ethi bona babophe abantu akade besilwa. UMlotshwa ulesibindi ngoba uthi kabuye ayemtshengisa abanye okumele babotshwe labo amapendeka.

Wazazisa epholiseni ukuba yena ungukhansila wesiqinti sePhumula.
Uyawatshela amapholisa uMlotshwa ukuba engazami ukugqibela ububi ngoba engabafaka emanyaleni bangene enkathazweni embi. Wathi amantombazana labo bonke abagcwele ezindlwaneni zikaMaDube kabathathwe bayevalelwa esitokisini.

Yibo abayindikimba yobubi kanye lobudlwangudlwangu obudlangileyo kuleyo ndlu. Wathi bangeke babukele abantwababo bekhilikithela eliweni lokufa. Ngeke belokhu beqakezela uMaDube ehlakulela isono esizabulala izilimo ezingela cala. Wathi asisutshunwe isono siyephoselwa elangabini ukuze siphele du.