uMthunywa
Luqoqwe lwahlelwa yiLiterature Bureau Lwakhitshwa yiMambo Press
Imbongi nguPS Malunjwa
Inkondlo le ikhuthaza abantu ukuthi bathandaze, bakhuleke kuSomandla, uMdali wabo ukuze bathole ukukhanya kwemazulwini. 
Imbongi ikhuthaza ukuthi amabandla abambane akhuleke ngalizwi linye. Kawaphakamisele amakhanda phezulu athandaze ukuze ukukhanya kwezulu kwehlele ngakunye.
Imbongi inikela kumabandla wona azi uMdali, emasabatheni lasemasontweni ukuthi kaguqe phansi athandazele umhlaba, ukuze uthando lubuse umhlaba.
Ngenye indlela imbongi ikhuthaza amabandla ukuthi athandazele uthando kube yilo olugcwala ebantwini. Iyavuma imbongi ukuba uthando luyanyenyeza ezinhliziyweni kodwa umona uyazihambela obala utshaya indiva uthando lolo.
Umona lowo uyazidinga uzithungatha ngolaka lezonhliziyo njalo amalangabi obubi ayachophelela kacitsheki.
Ububi buyabusa ebantwini, kodwa lanxa kunjalo uyawatshela amabandla kaNaphakade ukuthi uwa amacilongo encencetha, emasontweni phela. Uzwa amabandla lawo ehlabelela ingoma ezimnandi ezigcwele intokozo lothando.
Nxa amabandla lawo ehlabelela lamacilongo encencetha uzwa ebethwa ngumoya omnandi. Inhliziyo yakhe iba lokusutha, ithokoze ize ijuluke ngothando.
Imbongi ilokukhathazeka ukuthi uthando alusekho ebantwini ngakho-ke ukhuthaza amabandla ukuthi kawakhulekele uthando ngamandla amakhulu. Uthi abenze lokhu ngoba uthando nantu luyafiphala.
Luyancipha luyaphela uthando ebantwini, kodwa ngakwelinye icele umona kukhanya uyanda ngendlela ezibuhlungu.
Ngenxa yalokhu imbongi ikhuthaza amabandla ukuthi kawakhulekele phezulu, aklabalale.
Kawakhulekele phezulu amabandla enze umsindo omkhulu kuze kuzwe abangaboniyo, iziphofu, kanye lezacuthe, labo abangezwayo endlebeni. Ngokuklabalala lokho imbongi ilethemba ukuthi kuyachitheka uSathane ezweni.
Ekuchithekeni kukaSathane kuzasuka usitho lothando oluyize, olungasilweqiniso. Ngemva kwalokho inhliziyo ziyaphenduka zibemhlophe zingasela bubi kuzo.
Imbongi iphetha inkondlo yayo ilokhu ikhuthaza amabandla ukuthi kawakhulekele uthando, oluyilifa lawo elihle.
Ilifa lelo lingumthombo ongatshiyo, limnandi njalo kalithengwa. Ilifa lelo ngelenjabulo lentokozo, okuyikho okudingwa ngabantu empilweni yabo. Imbongi ikhuthaza umkhuleko wothando oluyilo oluqeda inzondano kube lokujabula okungelasiphelo.
