uMthunywa
Imbongi nguS J Mhlabi
Isihloko senkondlo — Imvumazono Yesibotshwa!
LAMHLA sihlangana lomuntu oyisoni esefike kubanga lokhuthi avume izono zakhe phambi koMdali wakhe onguNkulunkulu. Usesipha lezibonelo zalabo abaxolelwayo nxa kwasekufike ekucineni sekumele bafe.
Usitshela ukuthi uJesu Kristu wathethelela umphangi esesiphambanweni. Umphangi lowo kuthiwa wakhala wamemeza esithi phansi kukaJesu, kwathi yena uJesu wamthembisa ukwenaba kwempilo yaphakade.
Ngenxa yomusa owatshengiswa nguJesu kumphangi lowo owakhalela kuye, lalo lamhlanje osevuma izono uthi laye kathethelelwe ekubeka ngalamazwi: “Lami ngithethelela, Lami ngamukela Nkosi elomusa!”
Usedinga ukuthethelelwa ngamandla khathesi ngoba sekunzima emuva sekunzima phambili. Wayengaleli abazali bakhe bemxwayisa ukuthi kayekele ukwenza izinto ezingalunganga. Iyavuma le mvumazono yesibotshwa ukuthi yayibezwa bekhuluma abantu bethi, “Iyokhala ngomlozwi insizwa.”
Babemtshela lo osevuma izono zakhe lamhla ukuthi insizwa eqinileyo ezizwayo ukuthi kuzayiphelela ukuzenza isiqhwaga ikhale ngomlozwi sebeyivalele entolongweni. Iyaphambili limvumazono yesibotshwa ukuthi futhi yayisizwa abantu besithi, “Isalakutshelwa sasize, sizibonele sona ngomopho.” Lesi yisiga esijayelekileyo kakhulu esisetshenziswa nxa kukhuzwa umuntu olenkani otshelwa engalaleli izixwayiso zabantu. Layo le imvumazono babeyitshela ukuthi nxa iphikelela isenza okubi izabona ngomopho.
Lokhu kutsho ukuthi nxa usala ukulalela izixwayiso zabantu uzabona ususengozini. Nansi lamuhla isiphakathi kobunzima isikhumbula ukuthi babeyixwayisa ingalaleli. Izixwayiso ababeyinika zona abazali zonke yazenza iziga zeziNtandakulawula, konke lokhu ithi yathi yibuciko bamaciko obuyize. Yakutshaya indiva konke lokho kuxwayiswa ithi labo abayixwayisayo ngabathanda ukukhuluma, izintandakulawula.
Indlela ababemxwayisa ngayo yena uthi kwakuyibuciko, ubungcwethi bokukhuluma, bekhuluma izinto ezingelancedo eziyize.
Usevuma izono zakhe lumuntu, yikho kuthiwa yimvumazono yesibotshwa. Usebotshelwe izenzo zakhe ezimbi. Usevuma ukuthi nguye lowaya owayelaywa engalaleli ixixwayiso, isalakutshelwa phela. Usevuma ukuthi nguye lamuhla oyokhala ngomlozwi owasizwa kukhulunywa ngaye engalaleli. Uthi lamuhla nguye ozakhala ngomlozwi lasegodini ngoba wadelela ababemtshela bemxwayisa. Ukubeka obala ukuthi bathi bemtshela, bemxwayisa yena wakutshaya indiva lokho:
“Ngazenz’isihlakaniphi, ngazenz’isazi, Ngoba ngiyisomisantam’ihlongandlebe, ukhandakalithathi.” Kunzima lapha ngoba ungezwa umuntu esezichaza ngalamagama usevuma zonke izono zakhe. Akusela manceda ukuzama ukulandula iqiniso, sokumele avume acele ukuthethelelwa njengoba sesibonile ngale imvumazono yesibotshwa. Okungapheliyo kuyahlola. Lamuhla lo umuntu osevuma izono zakhe, uthi uyalikhumbula ilizwi likanina alizwa walidelela.
Uthi ilizwi likanina lelo langena ngakwenye indlebe laphuma kwenye. Lamuhla uthi uyakhumbula uswazi lukayise owalukhangela walweyisa, walufulathel, wahweda. Lokhu kutsho ukuthi wayedelela uswazi lukayise angaze atshaywe kuzanywa ukumqondisa yena aludelele asuke lapho azihwedele nje. Usekhumbula wonke amazwi abazali bakhe awezwa wawatshaya indiva kaze awalalela. Lamhla usevuma konke ayekuzwa kukhulunywa okunjengokuthi “umlomo uyaloya” uyadlulisa, ngoba ngenxa yokungalalali ilizwi labazali lamhlanje uzithola esephakathi kobunzima obunje, ebunzimeni obukhulu elindele isigwebo sokufa lokuphila.
